تۇركىستان وبلىسىندا ءبىر وتباسى مۇشەلەرى 70 پاتەردى توناعان
تۇركىستان. قازاقپارات - تۇركىستان وبلىسىنىڭ كريمينالدىق پوليتسيا قىزمەتكەرلەرى 70 پاتەردى توناعان قىلمىستىق توپتى اشكەرەلەدى.
كۇدىكتىلەر ءبىر وتباسى مۇشەلەرى بولىپ شىققان، دەپ حابارلايدى قازاقپارات ءتىلشىسى.
وبلىستىق پد باسپا ءسوز قىزمەتىنىڭ مالىمەتىنشە، قىلمىستىق توپتىڭ جەتەكشىسى ءوڭىردىڭ قازىعۇرت، كەلەس، ورداباسى جانە سارىاعاش اۋداندارىنىڭ اۋماقتارىنداعى تەرەزەدەن ءتۇسۋ ارقىلى ۇرلىق جاساپ جۇرگەن.
ءتارتىپ ساقشىلارى ۇرىلاردى لومباردقا وتكىزگەن تاۋارلارى ارقىلى تاپقان. كۇدىكتىنىڭ ءبىرى بۇرىن وسىنداي قىلمىستارى ءۇشىن سوتتالعان 26 جاستاعى ەر ادام بولىپ شىقتى. تەرگەۋ بارىسىندا ونىڭ تانىستارى مەن تۋىستارىنان تۇراقتى توپ قۇرىپ، ءارقايسىنا رولدەر ءبولىپ بەرگەنى انىقتالعان. ۇرلىق جاساعان كەزدە ولار مىندەتتى تۇردە ءۇي يەلەرىنىڭ جوقتىعىنا كوز جەتكىزىپ، ءۇيدىڭ تەرەزەسىندە توردىڭ، دابىل جۇيەسىنىڭ، بەينەباقىلاۋ كامەرالارىنىڭ بار-جوعىن ءبىلىپ وتىرعان. ءار قىلمىستى جاساۋعا مۇقيات دايىندالىپ، ءۇي يەلەرىنىڭ كۇن ءتارتىبىن زەرتتەگەن.
ۇرلىق جاساپ بولعان سوڭ سەزىكتىنى كۇيەۋ بالاسى كولىگىمەن بىردەن الىپ كەتىپ وتىرعان. ءارى قاراي ۇيىمداستىرۋشىنىڭ اناسى مەن جۇبايى ۇرلانعان اشەكەي بۇيىمداردى پۇلداپ، تۇسكەن پايداسىن ءوزارا بولىسكەن.
«پاتەرلەردەن ۇرلانعان التىن اشەكەي بۇيىمدارىن كۇدىكتىلەر سوڭعى ەكى جىلدان بەرى شىمكەنت پەن جەتىساي، سارىاعاش قالالارىنداعى لومباردتارعا وتكىزىپ وتىرعان. ءسويتىپ جابىرلەنۋشىلەرگە 100 ميلليون تەڭگەدەي شىعىن كەلتىرگەنى بەلگىلى بولىپ وتىر. قازىرگى تاڭدا قىلمىستىق توپتىڭ ءۇش مۇشەسى قاماۋعا الىنعان» دەلىنگەن حابارلامادا.
اۆتور: اينۇر اقبايەۆا
