قوسشىدا 70 كاسىپكەر جاپسارجايدان ايىرىلۋى مۇمكىن

كوكشەتاۋ. قازاقپارات - قوسشى قالاسىندا 70 كاسىپكەر جاپسارجايدان ايىرىلۋى مۇمكىن. بۇل تۋرالى قازاقستان كاسىپكەرلەرىنىڭ قۇقىقتارىن قورعاۋ جونىندەگى ۋاكىل رۋستام ءجۇرسىنوۆتىڭ جەرگىلىكتى كاسىپكەرلەرمەن وتكىزگەن كەزدەسۋىندە ايتىلدى، دەپ حابارلايدى قازاقپارات ءتىلشىسى.
None
None

وسىدان 6 جىلدان استام ۋاقىت بۇرىن قوسشى قالاسىنىڭ 70 كاسىپكەرى «لەسنايا پوليانا» تۇرعىن ءۇي كەشەنىندەگى بيزنەس نىسانىن اعىن سۋ مەن قاردان قورعاۋ ءۇشىن جاپسارجاي سالعان. سودان بەرى كاسىپكەرلەر وسى جاپسارجاي سالىنعان جەر تەلىمىن زاڭداستىرا الماي كەلەدى. بۇگىنگى تاڭدا كەيبىر بيزنەس سۋبەكتىلەرىنە قاتىستى سوت قوسىمشا قۇرىلىستاردى الىپ تاستاۋ جونىندە شەشىم شىعارعان. وڭىرلىك كاسىپكەرلەر پالاتاسى ديرەكتورىنىڭ ورىنباسارى راسۋل سىزدىقوۆتىڭ ايتۋىنشا، قوسشى قالاسىنىڭ اكىمى قاتىسقان كەڭەستە بۇل ماسەلە كوتەرىلگەن.

سوت ورىنداۋشىلارى كاسىپكەرلەرگە جەر تەلىمىن راسىمدەۋگە ۋاقىت بەرىپتى. ولار جەرگىلىكتى اتقارۋشى ورگاندار ارقىلى جەر ۋچاسكەلەرىن رەسىمدەۋى كەرەك ەدى. الايدا، پروتسەس ءتۇرلى سەبەپتەرمەن ۇزاققا سوزىلىپ بارادى.

«بۇل ءبىر عانا ادامنىڭ ماسەلەسى ەمەس، 70 كاسىپكەردى مازالاپ وتىر. ال، قوسشى قالاسىنىڭ جەرگىلىكتى اتقارۋشى ورگاندارى نىسانداردى ءوز بالانسىنا الۋعا اسىعار ەمەس. اكىمدىك و باستا دۇرىس جۇمىس ىستەگەندە، مۇنداي ماسەلە تۋىنداماس ەدى»، - دەيدى «اتامەكەن» ۇ ك پ كاسىپكەرلەردى قۇقىقتىق قورعاۋ دەپارتامەنتىنىڭ ديرەكتورى قۋانىشبەك مۇقاش.

بيزنەس- ومبۋدسمەن ماسەلەنى ءوز باقىلاۋىنا الاتىنىن ايتتى.

«ءبىز اشىق مەملەكەتتە ءومىر ءسۇرىپ جاتىرمىز جانە ازاماتتاردىڭ سۇرانىستارىنا ۋاقىتلى جاۋاپ بەرۋىمىز كەرەك. وڭىرلىك كاسىپكەرلەر پالاتاسىنىڭ ساراپشىلارىنا اپتا سايىن اعىمداعى جاعداي تۋرالى بايانداۋدى تاپسىرامىن. وبلىس اكىمدىگىنەن ماسەلەنى شەشۋگە قوسىلۋدى جانە كاسىپكەرلەر رۇقسات قۇجاتتارىن الۋى ءۇشىن جەر ۋچاسكەلەرىن قوسشى قالاسى اكىمدىگىنىڭ بالانسىنا بەرۋدى جەدەلدەتۋدى سۇرايمىن»، - دەدى قازاقستان كاسىپكەرلەرىنىڭ قۇقىقتارىن قورعاۋ جونىندەگى ۋاكىل رۋستام ءجۇرسىنوۆ.

ايتا كەتسەك، اقمولا وبلىسىندا وقۋشىلاردى مەكتەپكە تاسىمالداۋداعى زاڭسىزدىقتار ءۇشىن 53 لاۋازىمدى تۇلعا جازالانعان ەدى.

سوڭعى جاڭالىقتار