قازاقستاندا ۆاكسينالانۋى ءتيىس كونتينگەنتتىڭ 70 پايىزعا جۋىعى ەكپە الدى
بۇل تۋرالى ق ر د س م قوعامدىق دەنساۋلىق ساقتاۋ ۇلتتىق ورتالىعى باسقارماسى ءتوراعاسىنىڭ ورىنباسارى ايناگۇل قۋاتبايەۆا ايتتى، دەپ حابارلايدى قازاقپارات ءتىلشىسى.
«وسى جىلدىڭ 1-اقپانىنان باستاپ قازاقستاندا حالىقتى كوروناۆيرۋس ينفەكسياسىنا قارسى جاپپاي ۆاكسينالاۋ ەنگىزىلدى. جالپى، 9 ميلليوننان استام ادامدى ۆاكسيناتسيالاۋ جوسپارلانعان. 2-قىركۇيەكتەگى مالىمەتكە سايكەس، ۆاكسينانىڭ 1-كومپونەنتىمەن 6748762 ادام قامتىلدى. بۇل حالىقتىڭ ۆاكسينالانۋى ءتيىس كونتينگەنتىنىڭ 67,7 پايىزىن قۇرايدى. بۇگىندە 2-كومپونەنتتى 5 559692 ادام، ياعني 55,8 پايىزى الدى»، - دەدى ول «جولداۋ 2021: ىسكە اسىرۋ جولدارى» تاقىرىبىنا ارنالعان دوڭگەلەك ۇستەل وتىرىسى بارىسىندا.
ونىڭ اتاپ وتۋىنشە، قازىرگى ۋاقىتتا ەلىمىزدە ۆاكسينانىڭ 3 تەن 5 كە دەيىنگى ءتۇرىنىڭ 1-دوزاسى قول جەتىمدى. ۆاكسينا ءتۇرى وڭىرلەرگە بايلانىستى ازايىپ نە كوبەيىپ وتىرادى.
«وڭىرلەردەگى حالىقتىڭ بەلسەندىلىگى ءارتۇرلى. قالالاردا جوعارى بەلسەندىلىك بايقالادى. حالىقتىڭ قۇلاعدار بولۋىن ۇلعايتۋ، مەديتسينا قىزمەتكەرلەرى ساۋاتتى ءارى دۇرىس ءتۇسىندىرۋى ءۇشىن جۇمىستار كەشەندى تۇردە بەلسەندى جۇرگىزىلۋدە. دەنساۋلىق ساقتاۋ باسقارمالارى، سانيتارلىق- ەپيدەميولوگيالىق باقىلاۋ كوميتەتىنىڭ اۋماقتىق دەپارتامەنتتەرى تاراپىنان مەديتسينا قىزمەتكەرلەرىن وقىتۋ تۇراقتى جۇرگىزىلەدى»، - دەدى ايناگۇل قۋاتبايەۆا.
ەسكە سالساق، 1-قىركۇيەك كۇنى ق ر پرەزيدەنتى قاسىم-جومارت توقايەۆ «حالىق بىرلىگى جانە جۇيەلى رەفورمالار - ەل وركەندەۋىنىڭ بەرىك نەگىزى» اتتى حالىققا جولداۋىن جاريالادى. جولداۋدىڭ تولىق ءماتىنى مىنا جەردە.
