قاشىقتان جۇمىس ىستەيتىن قازاقستاندىقتاردىڭ 70 پايىزى ايەلدەر

نۇر-سۇلتان. قازاقپارات - COVID-19 پاندەمياسىنان تۋىنداعان وتكەن جىلعى قۇلدىراۋدان كەيىن ەڭبەك نارىعىنداعى جاعدايدى قالپىنا كەلتىرۋمەن قاتار، ەڭبەك قىزمەتىنىڭ بالامالى نىساندارىن دامىتۋ ارقىلى جۇمىسپەن قامتۋدىڭ سيپاتى دا وزگەرۋدە.

بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنەن ءمالىم بولدى، دەپ حابارلايدى قازاقپارات.

«بۇگىنگى تاڭدا الەمدەگى ءاربىر 5- ادام قاشىقتان جۇمىس ىستەۋگە كوشتى نەمەسە ۇيىندە جۇمىس ىستەي باستادى. «ەڭبەك رەسۋرستارىن دامىتۋ ورتالىعى» ا ق (ە ر د و) ساراپشىلارىنىڭ دەرەكتەرىنە سايكەس، قازاقستاندا 2021 -جىلدىڭ 1-توقسانىنىڭ قورىتىندىسى بويىنشا 73,7 مىڭ ادام قاشىقتان جۇمىس ىستەدى، ولاردىڭ 70,2 پايىزى نەگىزىنەن قالادا تۇراتىن ايەل ادامدار»، - دەلىنگەن مينيسترلىك مالىمەتىندە.

2020 -جىلدىڭ باسىم بولىگىندە COVID-19 سالدارىنان جۇمىستىڭ يكەمدى تۇرلەرىنە كوشۋ پروتسەسىن جەدەلدەتۋ بۇگىندە قازاقستاندا قاشىقتان جۇمىسپەن قامتۋدىڭ كەڭ تارالۋىندا كورىنىس تابۋدا. قاشىقتان جۇمىس ىستەگەن نەمەسە جۇمىس ىستەي باستاعان ازاماتتاردىڭ ەڭبەك قىزمەتىن ەنگىزۋ - ءوز كەزەگىندە قوعامنىڭ جۇمىسپەن قامتۋدىڭ بالامالى نىساندارىن قابىلداۋ پروتسەسىن جەدەلدەتۋگە مۇمكىندىك بەردى. وسىنىڭ ناتيجەسىندە قازاقستاندا ەركىن تابىس دەپ اتالاتىن ەكونوميكانىڭ دامۋى، ەڭبەك قىزمەتىنە ايەلدەر مەن اۋىل تۇرعىندارىن بەلسەندى تارتۋ بولدى. ە ر د و ستراتەگيا جانە جوبالىق باسقارۋ دەپارتامەنتىنىڭ ديرەكتورى الەكساندرا مولچانوۆسكايانىڭ ايتۋىنشا، ەل بويىنشا قاشىقتان جۇمىس ىستەيتىن ءاربىر 3-ادام اۋىل تۇرعىنى بولىپ وتىر. جۇمىس بەرۋشىلەر قاشىقتان جۇمىس ىستەيتىن قىزمەتكەرلەردىڭ تەك 14 پايىزىنا عانا كوممۋنيكاتسيا قۇرالدارىن بەرگەن.

اۆتور: رۋسلان عابباسوۆ