قازاقستاندا كوروناۆيرۋسقا تاۋلىگىنە 70 مىڭ تەستىلەۋ جۇرگىزىلەدى

بۇل تۋرالى ق ر دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ ءتورايىمى ايجان ەسماعامبەتوۆا ءمالىم ەتتى، دەپ حابارلايدى قازاقپارات ءتىلشىسى.

«ەستەرىڭىزدە بولسا، شىلدە ايىندا قازاقستاندا تەستىلەۋ دەڭگەيى تاۋلىگىنە 40 مىڭنان ءسال استام بولاتىن. قازىرگى كەزدە بۇل كورسەتكىش تاۋلىگىنە 70 مىڭعا جەتكىزىلدى. جۇرگىزىلگەن تەستىلەۋ كولەمى ەپيدەميولوگيالىق جاعدايدى ەسكەرە وتىرىپ ارتىپ كەلەدى»، - دەدى ول ورتالىق كوممۋنيكاتسيالار قىزمەتىندە.

ونىڭ سوزىنە قاراعاندا، وتكەن اپتادا ەل بويىنشا تەستىلەۋ سانىنىڭ 10 پايىزعا وسكەنى بايقالدى. ال كەيبىر وڭىرلەردە بۇل كورسەتكىش ەسەلەپ ارتتى.

«سولتۇستىك قازاقستان وبلىسىندا تەستىلەۋ ءۇش ەسەگە، شىعىس قازاقستان وبلىسىندا ەكى ەسەگە، الماتى وبلىسىندا 2,4 ەسەگە، اقمولا وبلىسىندا 1,6 ەسەگە ءوستى. سونىمەن قاتار، قالعان وڭىرلەردە دە تەستىلەۋ دەڭگەيى ارتىپ كەلەدى»، - دەدى كوميتەت باسشىسى.

بۇدان بۇرىن حابارلانعانداي، ق ر دەنساۋلىق ساقتاۋ ۆيتسە-ءمينيسترى اجار عينيات كوروناۆيرۋسپەن سىرقاتتانۋدىڭ ءوسۋى بارلىق وڭىرلەردە بايقالعانىن ايتتى.