نۇر-سۇلتاندا جەڭىس كۇنىنە وراي 70 كە جۋىق شارا وتەدى
«بۇل جىل ءبىز ءۇشىن ەرەكشە. جەڭىستىڭ 75 جىلدىعىن وتكىزۋ - ماڭىزدى شارا. ءبىز ەكىنشى دۇنيەجۇزىلىك سوعىستاعى جەڭىستىڭ قازاقستان ءۇشىن تاريحي ماڭىزى بار ەكەنىن بىلەمىز. وسكەلەڭ ۇرپاققا وسى وقيعانى جەتكىزۋ قاجەت. بۇگىن جەڭىستىڭ 75 جىلدىعىن مەرەكەلەۋ تۇجىرىمداماسى دايىندالدى»، - دەدى قالا اكىمىنىڭ ورىنباسارى باقتيار ماكەن.
مەرەكە اياسىندا قالادا 70 كە جۋىق ءىس-شارا وتەدى. ولاردىڭ قاتارىندا 40 مىڭ ادامنىڭ قاتىسۋىمەن «جاۋجۇرەك پولك - بەسسمەرتنىي پولك» شەرۋى، ەلوردا تۇرعىندارى مەن قوناقتارىنا جەڭىس لەنتاسىن تاراتۋ جانە باسقا دا شارالار بار.
«ەلوردادا ارداگەرلەر ۇيىمدارى مۇشەلەرىنىڭ، بەلگىلى قوعام قايراتكەرلەرى مەن ءماسليحات دەپۋتاتتارىنىڭ قاتىسۋىمەن جەڭىستىڭ 75 جىلدىعىنا ارنالعان ءىس-شارالاردى دايىنداۋ جانە وتكىزۋ جونىندەگى كوميسسيا قۇرىلدى. ءىس-شارالار كەشەنى سوعىس ارداگەرلەرى مەن تىل ەڭبەككەرلەرىنە ارنالعان پروفيلاكتيكالىق مەديتسينالىق تەكسەرۋدەن، قايىرىمدىلىق جانە پاتريوتتىق اكتسيالاردان تۇرادى. ناۋرىز ايىنىڭ سوڭىندا ەلوردالىق سوعىس ارداگەرلەرىنىڭ فوتوسۋرەتتەرى بار بيلبوردتار مەن باننەرلەردى ورنالاستىرۋعا كىرىسەمىز. سونداي-اق ارداگەرلەر كەڭەسىمەن بىرگە قالا ارداگەرلەرى تۋرالى كىتاپ شىعارماق ويىمىز بار. ماتەريالدار جاقىن ارادا باسپا ءسوز قۇرالدارى ءۇشىن دايىن بولادى»، - دەپ اتاپ ءوتتى قوعامدىق دامۋ ىستەرى باسقارماسىنىڭ باسشىسى تالعات راحمانبەردى.
قوعامدىق دەنساۋلىق ساقتاۋ باسقارماسىنىڭ اقپاراتى بويىنشا، سوعىس ارداگەرلەرى ۇيدە كەشەندى مەديتسينالىق تەكسەرۋدەن وتەدى، سونىڭ ىشىندە ولارعا وفتالمولوگ، كارديولوگ جانە باسقا دا ماماندار كەڭەس بەرەدى. سونداي-اق جالعىز باستى ارداگەرلەر مەن مۇگەدەكتەرگە تەگىن ءدارى-دارمەك جەتكىزۋ جالعاسادى.
استانالىق ارداگەرلەر كەڭەسىندە تىل ارداگەرلەرى ءۇشىن دە مەديتسينالىق تەكسەرۋ ۇيىمداستىرۋ ۇسىنىلدى. ايتا كەتسەك، قالادا وسى ساناتتاعى ادامدار سانى ءۇش مىڭعا جۋىق.
«ولاردىڭ كوپشىلىگىنىڭ جاسى 90 نىڭ ماڭايىندا، مۇنداي جاستا جالپى كەزەكتە تۇرۋ قيىن. كەيدە بەلگىلى ءبىر سالا ماماندارى جەتىسپەي جاتادى. ولار ءۇشىن تىل ارداگەرلەرىنە بەكىتىلگەن جەرلەردە، ەمحانالاردا بارۋ كەستەسىن رەتكە كەلتىرۋ قاجەت»، - دەدى قالالىق ارداگەرلەر كەڭەسىنىڭ ءتوراعاسى سانسىزباي ەسىلوۆ.
وسىعان بايلانىستى باقتيار ماكەن تىل ارداگەرلەرىن مەديتسينالىق تەكسەرۋدەن تولىق قامتۋ ءۇشىن اكتسيا ۇيىمداستىرۋدى تاپسىردى. ⠀
سونداي-اق، جيىندا سوعىس باتىرلارىنا ارنالعان ەسكەرتكىشتەردى قالپىنا كەلتىرۋ جانە ولارعا ىرگەلەس اۋماقتى اباتتاندىرۋ تۋرالى ايتىلدى. قازىرگى ۋاقىتتا نۇر-سۇلتاندا 48 سوعىس ارداگەرى، ولارعا تەڭەستىرىلگەن 1700 دەن استام ادام جانە 3 مىڭعا جۋىق تىل ەڭبەككەرى تۇرادى.
