بەيجىڭدە ق ح ر قۇرىلعانىنا 70 جىل تولۋىنا وراي اسكەري پاراد بولدى

وعان قىتاي حالىق ازاتتىق ارمياسىنىڭ 15 مىڭ اسكەري قىزمەتشىسى، 580 اسكەري تەحنيكا جانە 160 اسكەري ۇشاق قاتىستى.

اۋقىمدى پارادتى ق ح ر ءتوراعاسى شي جينپيڭ قابىلدادى.

پارادتا جاڭا اسكەري تەحنيكا ۇلگىلەرى جۇرتشىلىققا العاش رەت كورسەتىلدى. ولاردىڭ اراسىندا قۇرلىقارالىق «DF-41» بالليستيكالىق زىمىرانى، «DF-17» گيپەردىبىستىق گلايدەر زىمىران تاسىمالداعىشى، H- N6 ستراتەگيالىق بومبالاعىشى، دىبىستان جىلدام ۇشاتىن «CJ-100» قاناتتى زىمىرانى، سوققى بەرەتىن «Lijian» باسقارۋشىسىز ۇشاتىن («ستەلس» تەحنولوگياسىمەن ۇشاتىن) ۇشاعى، ت. ب. بار.

اۋەدە ۇشقان اسكەري ۇشاقتار، جويعىش ۇشاقتار، تىكۇشاقتار، كولىك ۇشاقتارى پارادقا ەرەكشە كورىنىس سىيلادى. 1,3 مىڭ اسكەري قىزمەتشى قاتىسقان وركەستر پارادتى مۋزىكامەن سۇيەمەلدەپ تۇردى.

قىتايدىڭ بىتىمگەرلەرى دە العاش رەت اسكەري پارادقا قاتىستى. ق ح ر-نىڭ بىتىمگەرلەرى (2,5 مىڭنان استام) ب ۇ ۇ قاۋىپسىزدىك كەڭەسىنىڭ تۇراقتى مۇشەلەرى اراسىندا ەڭ كوبى. جالپى پاراد 80 مينۋتقا سوزىلدى.

پاراد سوڭىندا 100 مىڭعا جۋىق ادامنىڭ قاتىسۋىمەن سالتاناتتى شارا بولدى. قىتاي قوعامىنىڭ بارلىق بۋىندارىنان جينالعان قيساپسىز ادام بەيجىڭنىڭ باستى كوشەسى - چاڭانجە جانە تيانانمىن الاڭىنان ءجۇرىپ ءوتتى.

مەملەكەتتىك مەرەكە قۇرمەتىنە 70 مىڭ كوگەرشىن مەن ءتۇستى شارلار ۇشىرىلدى.

ودان ءارى گالا-كونسەرت قويىلىپ، وتشاشۋ بولدى.

ەسكە سالايىق، بۇگىن قىتايدا «التىن اپتا» باستالادى. ياعني اسپان استى ەلىنىڭ تۇرعىندارى 7 -قازانعا دەيىن دەمالادى.

اۆتور: رۋسلان سۇلەيمەنوۆ