سيرياداعى تۇرعىن ۇيلەردىڭ 70 پايىزى قيراعان
ۇكىمەتتىك اسكەر قارۋلى جاساقتاردىڭ سوڭعى تىرەگى سانالاتىن يدليب پروۆينتسياسىندا شابۋىلعا شىقتى. جاياۋ اسكەر قيمىلىنا اۋىر ارتيللەريا مەن تانكتەر قولداۋ بەرىپ، رەسەي مەن سيريا ۇشاقتارى جاساقشىلاردىڭ بەكىنىستەرىن بومبالاپ جاتىر.
حالىقارالىق قاۋىمداستىق وكىلدەرى كوپتەگەن بەيبىت تۇرعىننىڭ قازاسىنا اكەلۋى مۇمكىن وسى شابۋىلدى دوعارۋدى تالاپ ەتىپ وتىر. الايدا داماسك رايىنان قايتپاي تۇر. جانجالعا قاتىسقان تاراپتار سانى دا ازايعان جوق. دونالد ترامپتىڭ مالىمدەمەلەرىنە قاراماستان، ا ق ش ءوز اسكەرىن شىعارۋعا اسىقپاي وتىر. ولار كەتكەن جاعدايدا وزدەرىنە وداقتاس كۇردتەرگە شابۋىل جاسالاتىنىنان قاۋىپتەنۋدە. ەلدىڭ سولتۇستىگىن ءوز باقىلاۋىندا ۇستاپ تۇرعان كۇرد جاساقتارىنا قارسى تۇركيا جاۋلاس. رەسەي ۇشاقتارى دا اسكەري قيمىلعا قاتىسىپ وتىر. يزرايل بولسا، يران مەن حەزبوللانىڭ نىساندارىنا دۇركىن- دۇركىن سوققىلار جاساپ ءجۇر.
ۆيكتور ۆەرتسنەر، اسكەري ساراپشى:
- يزرايل اسۋعا بولمايتىن مەجەلەردى بەلگىلەپ، ول تۋرالى وسى جانجالعا قاتىسقان بارلىق تاراپقا حابارلاعان بولاتىن. مەنىڭ ويىمشا، ءبارى وسىنى ءتۇسىنىپ وتىر جانە جاساعان ءتۇرلى مالىمدەمەلەرىنە قاراماستان، ارەكەتتەرى سول قالپى جالعاسا بەرەدى. سيرياداعى جاعدايدى ۋشىقتىرىپ وتىرعان تاعى دا ءبىر ماسەلە - بوسىپ جۇرگەن ميلليونداعان ادام. ورالايىن دەسە، كوبىندە تۇراتىن باسپانا جوق.
قۇقىق قورعاۋشى ۇيىمداردىڭ مالىمەتىنشە، سوعىستان سيرياداعى تۇرعىن ۇيلەردىڭ 70 پروتسەنتى قيراعان. الەپپو سەكىلدى كەيبىر قالالاردا ءتىپتى ءبۇتىن بىردە- ءبىر عيمارات قالماپتى. سول سەبەپتەن، ابىروي بولىپ، ۇرىس توقتاعان جاعدايدا دا، سيريا ۇكىمەتىنە تۇرعىندارىن باسپانامەن قامتۋ قيىن ماسەلە بولماق.
www.24.kz