جاپونيادا 70 جاستان كەيىن زەينەتكە شىققانداردىڭ زەينەتاقىسى ارتادى

استانا. قازاقپارات - حالقى ەڭ ۇزاق ءومىر سۇرەتىن جاپونيا ەلى زەينەتاقى رەفورماسىن جاساۋدى جوسپارلاپ وتىر. پرەمەر- مينيستر سيندزو ابە جاپوندىقتارعا زەينەتكە 70 جاستان كەيىن شىعۋعا ۇسىنىس ءبىلدىرىپ، ونىڭ ورنىنا تولەماقىنىڭ كولەمى ارتاتىنىن جەتكىزدى، دەپ حابارلايدى قازاقپارات BBC- گە سىلتەمە جاساپ.

الەمنىڭ دامىعان مەملەكەتتەرىنىڭ كوپشىلىگى زەينەتكە شىعۋ جاسىن 65 جاستان اسىرۋعا قىزىعۋشىلىق تانىتىپ وتىر. ال جاپونيا حالقىنىڭ دەموگرافياسى مەن ۇلتتىق مىنەزىندەگى ەرەكشەلىكتەر بۇل جارىستا باسىپ وزۋعا ماجبۇرلەيدى.

سيندزو ابە 6 جىلدان بەرى ۇكىمەتتى باسقارىپ كەلەدى جانە قىركۇيەك ايىندا تاعى دا 3 جىلدىق مانداتتى الۋى مۇمكىن. ابە الدىڭعى قاتارلى Nikkei جاپون گازەتىنە بەرگەن سۇحباتىندا بۇل مەرزىمدى الەۋمەتتىك سالانى رەفورمالاۋعا جانە ەلدىڭ باستى پروبلەماسى - دەموگرافيالىق ماسەلەنى شەشۋگە ارناعىسى كەلەتىنىن ايتتى.

ابە باسقارعان ۋاقىت ارالىعىندا جاپونيا حالقىنىڭ جىلدام قارتايۋى مەن ازايۋىنا قاراماستان، ەل ەكونوميكاسى 8 پايىزعا وسكەن. بۇل زەينەتكەرلەردى ەكونوميكاعا ارالاسۋعا تارتۋمەن بايلانىستى بولۋى مۇمكىن. مىسالى، 2012 -جىلى 65 جاستان اسقان ازاماتتاردىڭ 20 پايىزى عانا ەڭبەك ەتسە، قازىر بۇل كورسەتكىش 23,5 پايىزعا دەيىن كوتەرىلگەن.

پرەمەر- ءمينيستردىڭ ايتۋىنشا، بۇل ءۇردىستى بەكىتىپ، ارى قاراي دامىتۋ كەرەك. ۇكىمەت باسشىسى ول ءۇشىن جاپوندىقتارعا زەينەتاقى تولەمدەرىنەن 70 جاستان كەيىن دە باس تارتۋعا رۇقسات بەرىپ، بۇل مەجەدەن اسقان سوڭ كوبىرەك اقشا الۋعا مۇمكىندىك جاساۋ كەرەك دەگەن ويدا.