پاۆلوداردا «ۇلى دالا» فەستيۆالىنە شەت ەلدەردەن 70 تەن استام دەلەگات كەلدى
وبلىستىق مادەنيەت، ارحيۆتەر جانە قۇجاتتاما باسقارماسىنىڭ باسشىسى ارداق رايىمبەكوۆتىڭ ايتۋىنشا، جىل وتكەن سايىن شارانىڭ ماڭىزى مەن قاتىسۋشىلاردىڭ سانى ارتا تۇسۋدە. بۇل جولى التى مەملەكەتتەن - قىتاي، موڭعوليا، تاجىكستان، وزبەكستان جانە رەسەي ەلىنەن قوناقتار شاقىرىلىپ، 70 تەن استام دەلەگات الىس جانە جاقىن شەتەلدەن كەلگەن.
- «ۇلى دالا» ەتنوفەستيۆالى بەس ماڭىزدى مەرەيتوي داتالارىنا ورايلاستىرىلىپ وتىر، - دەيدى ارداق رايىمبەكوۆ. - ناقتىراق ايتساق، بيىل سۇلتانماحمۇت تورايعىروۆتىڭ 125 جىلدىعى، ەستاي بەركىمبايەۆتىڭ 150 جىلدىعى، ءماشھۇر ءجۇسىپتىڭ 160 جىلدىعى، مۇسا شورمانوۆتىڭ 200 جىلدىعى جانە بۇقار جىراۋدىڭ 350 جىلدىعى اتالىپ وتەدى.
ءار اۋىلدا ۇيىمداستىرۋشىلار وزدەرىنىڭ قولدانبالى ونەر كورمەسى مەن تەاترلاندىرىلعان قويىلىم ۇسىنادى. توسىن سىيلار وتە كوپ. قوناقتار ءۇشىن اسپاننان پاراشيۋتيستەر شاشۋ شاشادى. ەرتەڭ «قوياندى جارمەڭكەسى» مەن وبلىس جانە باسقا وڭىرلەردەگى كىتاپحاناشىلاردىڭ ۇيىمداستىرۋىمەن «تاۋەلسىزدىك ءداۋىرى» كورمەسى وتەدى. بۇگىنگى مەرەكەلىك شارالار ساعات بەسكە دەيىن جالعاسادى.
كەشكە اشىق اسپان استىندا س. سەيفۋللين اتىنداعى قازاق دراما تەاترىنىڭ «كومەكەي اۋليە بۇقار جىراۋ» قويىلىمىن تاماشالاۋعا بولادى». بىلتىرمەن سالىستىرساق، وتكەن جىلى كيىز ۇيلەر سانى 80 نەن استام بولسا، بيىل 100 دەن اسقان. ۇلتتىق سالت-ءداستۇر مەن قازاق تاريحىنان سىر شەرتەتىن قۇندىلىقتاردى دارىپتەۋ ماقساتىندا ءوتىپ جاتقان فەستيۆالگە قازاق دياسپورلارى دا بەلسەندى اتسالىسۋدا.
ەسكە سالا كەتەيىك، كەشە عانا ءداستۇرلى اندەر فەستيۆالىندە توعىز وبلىستان ارداق بالاجانوۆا مەن گۇلميرا سارينا، ايگۇل ەلشىبايەۆا سىندى تانىمال حالىق انشىلەرى ونەر كورسەتتى. ال ەستاي اتىنداعى مادەنيەت سارايىندا 1000 نان استام ادامنىڭ قاتىسۋىمەن ۇلكەن عىلىمي-پراكتيكالىق كونفەرەنسيا ۇيىمداستىرىلدى.
