گرەكيا ورماندارىنداعى الاپات ءورت: قازا بولعاندار سانى 70 تەن استى
افينىنىڭ ماكەدونيالىق جاڭالىقتار اگەنتتىگى سەيسەنبى كۇنى حابارلاعانداي، ءورت سالدارىنان اجال قۇشقاندار سانى 74 ادامعا جەتتى. تاعى 187 ادام، سونىڭ ىشىندە 23 بالا زارداپ شەكتى.
گرەكيا ۇكىمەتى الاپات ورمان ورتىنەن زارداپ شەككەندەرگە كومەك كورسەتۋ ءۇشىن 20 ميلليون ەۋرو بولەتىن بولدى. بۇل تۋرالى 24- شىلدە كۇنى اتالمىش توتەنشە جاعدايعا ارنالعان ۇكىمەت وتىرىسىنىڭ ناتيجەسى بويىنشا مينيسترلەر كابينەتىنىڭ رەسمي وكىلى ديميتريس تزاناكوپۋلوس ءمالىم ەتتى.
تزاناكوپۋلوستىڭ سوزىنشە، 20 ميلليون ەۋرو ورتتەردەن زارداپ شەككەن مۋنيتسيپاليتەتتەر مەن ولاردىڭ تۇرعىندارىنىڭ قاجەتتىلىگىن وتەۋ ءۇشىن ىشكى ىستەر مينيسترلىگىنىڭ ەسەپ-شوتىنا لاقتىرىلاتىن بولادى.
«بۇل شوتقا قاراجاتتار مەملەكەتتىك قۇرىلىمداردان جانە جەكەمەنشىك تۇلعالاردان تۇسەتىن بولادى. سەبەبى ەل ىشىندە دە جانە شەتەلدە دە تىلەكتەستىك بىلدىرۋشىلەر وتە كوپ»، - دەدى رەسمي وكىل.
ول سونداي-اق ۇكىمەتتەگى كەڭەس بارىسىندا زارداپ شەككەن اۋدانداردى ءتيىمدى قورعاۋ ءۇشىن پوليتسەيلەردىڭ، ءورت سوندىرۋشىلەر مەن اسكەريلەردىڭ قاتىسۋىمەن 19 بىرلەسكەن پاترۋل قۇرۋ شەشىمى قابىلدانعانىن اتاپ ءوتتى.
بۇعان دەيىن گرەكيانىڭ پرەمەر-ءمينيسترى الەكسيس تسيپراس ەلدە ۇلتتىق ازا تۇتۋ كۇنىن جاريالاعان بولاتىن. «بۇگىن گرەكيادا قارالى كۇن. قازا بولعانداردىڭ رۋحىنا وراي ۇشكۇندىك ۇلتتىق ازا تۇتۋ كۇنىن جاريالايمىز»، - دەدى ول.
گرەكيادا شىلدە ايىنىڭ باسىنان بەرى اۋا رايى ىستىق بولىپ تۇر. تەرمومەتر 38-40 گرادۋستى كورسەتۋدە. دۇيسەنبى كۇنى افينىنىڭ اينالاسىندا بىردەن بىرنەشە وت تۇتاندى - كينەت قالاسىنىڭ اۋماعىندا، افينىدان باتىسقا قاراي 50 شاقىرىم جەردە، شىعىس اتتيكادا جانە كالامكوس قالاسىنىڭ اۋماعىندا. سونداي-اق ءىرى ورمان ورتتەرى گرەكيانىڭ وزگە دە اۋماقتارىندا تىركەلدى.
