قازاقستان عالىمدارى سۇرانىسى جوعارى 70 تەن استام ءونىمدى ۇسىنادى

«2016 -جىلدان عىلىمي- زەرتتەۋ جۇمىستارىنىڭ ناتيجەلەرىن كوممەرتسيالاۋعا بايلانىستى شارالار قارقىندى باستالدى. بۇل ءوز كەزەگىندە عالىمدارىمىز ءۇشىن جاڭا باعىت بولىپ وتىر. نەگىزىندە زاڭناما وتە جاقسى جازىلعان، ناقتى ماسەلەلەر كورسەتىلگەن»، - دەپ توقتالدى ب. ءابدىراسىلوۆ «نۇر وتان» پارتياسىندا «جوعارى تەحنولوگيالاردى دامىتۋ» جونىندەگى كوميسسيانىڭ وتىرىسىندا.
كوميتەت باسشىسىنىڭ سوزىنە قاراعاندا، قازىرگى قازىرگى كەزدە كوممەرتسيالاندىرۋ پروتسەسى عىلىم قورى مەن دۇنيەجۇزىلىك بانك گرانتتارى ەسەبىنەن قولداۋعا يە بولۋدا. 2016-2017 -جىلدارى كوممەرتسيالاندىرۋ جوبالارىن گرانتتىق قارجىلاندىرۋعا ءۇش كونكۋرس وتكىزىلدى. قازىرگى ۋاقىتتا عىلىم قورى جەلىسى بويىنشا تاعى ءبىر كونكۋرس اياقتالۋعا جاقىندادى.
«جالپى، 2016 -جىلى ىرىكتەلىنىپ الىنعان 8,4 ميلليارد تەڭگەنىڭ 47 جوباسى قارجىلىندىرىلىپ جاتىر، ونىڭ ىشىندە بىرلەسىپ قارجىلاندىرۋدىڭ ۇلەسى 10 پايىزدى قۇرادى. سونىمەن قاتار قازىرگى كەزدە دۇنيەجۇزىلىك بانك جوبالارى اياسىندا 17 جوبانىڭ اۆتورلارىمەن گرانت تۋرالى كەلىسىمدى بەكىتۋ جونىندە جۇمىستار اتقارىلىپ وتىر. وسى ورايدا بۇل جوبالاردىڭ قۇنى 2,7 ميلليارد تەڭگەگە باعالانۋدا. بۇگىندە بيزنەس تاراپىنان تارتىلعان قارجىنىڭ ۇلەسى 911 ملن تەڭگەگە جۋىقتادى»، - دەدى كوميتەت ءتوراعاسى.
ونىڭ ايتۋىنشا، ءاربىر جوبانى جۇزەگە اسىرۋ كەزەڭى 3 جىلدى قۇرايدى. «جوبالاردىڭ اياقتالۋى ۋاقىتىنا قاراي (2018 -جىلدىڭ سوڭىندا) ونىمدەر مەن قىزمەتتەردىڭ 79 جاڭا ءتۇرىن قۇرۋ جوسپارلانىپ وتىر. سونىمەن قاتار جىل سايىن شىعارىلاتىن جانە ساتىلاتىن ءونىمنىڭ كولەمى 4,47 ميلليارد تەڭگەنى قۇراماق. وسى ورايدا سالىقتىق اۋدارىمدار 390,4 ميلليون تەڭگەگە جەتەدى»، - دەدى بولاتبەك ءابدىراسىلوۆ.
بۇدان بولەك ول بۇگىندە عالىمدار الدىندا اكىمشىلىك كەدەرگىلەر بار ەكەنىن اتاپ ءوتتى. «بۇل تۇرعىدا قازىر تالقىلانىپ جاتقان ماسەلەنىڭ ءبىرى كوممەرتسيالاندىرۋ جوبالارىن قوسىلعان قۇن سالىعىنان بوساتۋعا قاتىستى. بىزدە عىلىمي جوبالار قوسىلعان قۇن سالىعىنان بوساتىلعان، ال كوممەرتسيالاندىرۋ باعىتىندا جۇزەگە اسىرىلاتىن گرانتتىق جوبالارعا 12 پايىز ق ق س- تى تولەۋگە تۋرا كەلەدى. وسى ورايدا ءبىزدىڭ جۇمىستاردى قارجىلاندىرۋدىڭ دەڭگەيى تومەندەتىلەدى»، - دەدى كوميتەت باسشىسى.
اۆتور: رۋسلان عابباسوۆ