قۇربان ايت مەرەكەسىندە 70 تاكسي تەگىن قىزمەت كورسەتەدى
بۇل كولىكتەرگە «قۇربان ايتتىڭ قۇرمەتىنە تەگىن تاكسي» دەگەن ارنايى پلاكاتتار جاپسىرىلادى. «تەگىن تاكسيلەر قۇربان ايتتىڭ العاشقى كۇندەرى ياعني، ءبىرىنشى جانە ەكىنشى كۇندەرى حالىقتى تەگىن تاسىمالدايدى. بۇل كولىكتەر قالانىڭ كەز- كەلگەن جەرلەرىندە جۇرەدى. ەگەر دە ءۇشىنشى جانە ءتورتىنشى كۇندەرى حالىق تەگىن تاكسيگە سۇرانىس تانىتسا، ءبىزدىڭ ادامدار ول قىزمەتتى كورسەتۋگە دايىن. ول ءۇشىن ورتالىعىمىز «يمان» مەشىتىنە حابارلاسۋى كەرەك. ال قوعامدىق كولىكتەر ايتتىڭ ءبىرىنشى كۇنى حالىقتى تەگىن تاسىمالدايدى. ەسكەرتە كەتەتىن جايت، ءبىزدىڭ اكتسياعا ارنايى پلاكاتتار جازىلعان اۆتوبۋستار عانا قاتىسادى. تۇرعىندار وسى جايتقا ءمان بەرسە دەيمىز» ، - دەيدى «يمان» ورتالىق مەشىتىنىڭ باس يمامى سەرىكحان ىرىمحان ۇلى.
سونداي اق يمامنىڭ ايتۋىنشا، قۇربان ايت مەرەكەسىندە ءتۇرلى شارالار دا ۇيىمداستىرىلادى. ماسەلەن، تالدىقورعانداعى اتشاباردا ات جانە ۇلتتىق ويىن تۇرلەرىنەن جارىس وتەدى. الامان بايگەنىڭ باس جۇلدەسى 500 مىڭ تەڭگە. بۇل شارا قىركۇيەكتىڭ ءبىرى كۇنى ساعات 15:00 دە باستالادى. سونداي- اق ول جەردە حالىققا پالاۋ، ءتۇرلى تاتتىلەر مەن سىيلىقتار تەگىن تاراتىلادى. ال سول كۇنى كەشكىسىن جەتىسۋلىقتار قاراتال وزەنىنىڭ بويىنداعى ساياباقتا تاماشا وتشاشۋدى كورىپ، ءتۇرلى ويىندارعا قاتىسىپ، ءداستۇرلى ءدىنىمىز تۋرالى ماعلۇماتتار الا الادى. بۇل قۇربان ايتتىڭ العاشقى كۇنىندەگى شارالاردىڭ ءبىر پاراسى عانا. بۇدان وزگە دە مەرەكە كۇندەرى ءتۇرلى قايىرىمدىلىق اكسيالار وتەتىن بولادى.
اۆتور: سامال قابىشيەۆا
