جاسى 70 تەن اسقان زەينەتكەر ەكسپو- دا ەرىكتى بولىپ جۇمىس ىستەيدى
استانا قالاسى اكىمدىگى جاستار ساياساتى ماسەلەلەرى باسقارماسىنىڭ باسشىسى اسحات ورالوۆتىڭ ايتۋىنشا، ەرىكتىلەر اراسىنان جاستاردى دا، قارتتاردى دا كەزدەستىرۋگە بولادى.
«ەرىكتىلەردىڭ جۇزگە جۋىعى ەرەسەكتەر مەن زەينەتكەرلەر. ارنايى فورما العان ەرىكتىلەر جۇمىسقا ساقاداي ساي. ەڭ ۇلكەن ەرىكتى 70-تەن اسقان زەينەتكەر. ەڭ جاسى 15-تە، ول نازاربايەۆ زياتكەرلىك مەكتەبىندە وقيدى. 18 جاسقا دەيىنگى بارلىق ەرىكتىلەردى تەك اتا- انالارىنىڭ رۇقساتىمەن عانا قابىلدادىق»، - دەپ اتاپ ءوتتى ا. ورالوۆ.
سونىمەن بىرگە، اكىمدىك وكىلى ەرىكتىلەر قۇرامىنىڭ جاسى عانا ەمەس، ۇلتتىق بەلگىلەرىنىڭ دە ءار ءتۇرلى ەكەنىن حابارلادى.
«ەرىكتىلەر قۇرامىندا تەك قانا استانانىڭ عانا ەمەس، شەتەلدىك ستۋدەنتتەردىڭ دە بار ەكەنىن اتاپ وتكىم كەلەدى. ماسەلەن، شەت مەملەكەتتەردە وقيتىن بولاشاق ستۋدەنتتەرى بار. قىتايدا ءبىلىم الىپ جاتقان، قىتاي جانە اعىلشىن تىلدەرىن ەركىن مەڭگەرگەن 24 ستۋدەنت شىلدە ايىندا استاناعا كەلەدى جانە تامىز ايىندا ولارعا تاعى 59 ادام قوسىلادى. وعان قوسا، ميلانداعى ەكسپو- دا ەرىكتى بولعان 12 يتاليالىق ازامات ءوتىنىم بەردى، ولار ماۋسىم ايىنىڭ سوڭىندا كەلەدى»، - دەدى ول.
جالپى كورمە جۇمىسىنا ەرىكتى بولۋعا ءۇش مىڭنان استام استانالىق ستۋدەنتتەر ءوتىنىش بىلدىرگەن. ولاردىڭ اراسىنان كەمىندە ءۇش ءتىل بىلەتىن 1500 ەرىكتى ىرىكتەلىپ الىنعان.
ايتا كەتەيىك، ەكسپو-2017 كورمەسىندە 6 مىڭنان استام ەرىكتى جۇمىس ىستەيدى. 4500 ەرىكتى كورمە اۋماعىندا، 1500 ەرىكتى اۋەجاي، تەمىر جول ۆوكزالى، جەدەل مامانداندىرىلعان قىزمەتتەر، مادەني نىساندار، قوناق ۇيلەر سىندى قالانىڭ ماڭىزدى نىساندارىندا جۇمىس ىستەيدى. قالا ەرىكتىلەرى اراسىنداعى ەڭ بەلسەندى 20 ستۋدەنت قالا اكىمدىگىنىڭ ءبىر جىلدىق وقۋ گرانتىن يەلەنە الادى.
اۆتور: ايجان سەرىكجان قىزى