ەلىمىزدە بالاماسى جوق وقۋ ورنىنان 70 ازامات پارادقا قاتىسپاق

استانا. قازاقپارات - وتان قورعاۋشى كۇنىنە ارنالعان مەرەكەلىك اسكەري شەرۋگە ەلىمىزدىڭ جەتەكشى اۋە- بازالارىنداعى ەسكادريليالار دا قاتىسادى. قازىر شەرۋ وتەتىن الاڭدا سوڭعى دايىندىقتار پىسىقتالىپ جاتىر.

وسى جولى تالدىقورعانداعى 21/751 اسكەري ءبولىمنىڭ ۇشقىشتارى دا ءوز مۇمكىندىكتەرىن پاش ەتەدى.

 «جەتىسۋ بارىسى» اۋە- بازاسى رەسپۋبليكانىڭ اۋە قورعانىسىنداعى ەڭ تاڭداۋلىسى. ۇشقىشتار سوڭعى ۇلگىدەگى جويعىشتارمەن ۇشۋدى ەركىن مەڭگەرگەن. اسكەري ۇشقىش رۋسلان سماعۇلوۆتىڭ كوكتە سامعاعان ۋاقىتىنىڭ جالپى جيىنتىعى -  600 ساعات.

رۋسلان سماعۇلوۆ، اسكەري ۇشقىش:

 - اسپاندا ۇشۋ -  كەرەمەت سەزىم. ونىڭ اسەرىن ايتىپ جەتكىزۋ ءۇشىن ۇشۋ كەرەك. ءوز باسىم، ۇشا بەرگىم كەلەدى.

«بايىرعى ۇشقىشتار جاستارعا اقىل- كەڭەس بەرۋدەن جالىقپايدى»، - دەيدى كومانديردىڭ تاربيە جانە يدەولوگيالىق جۇمىستار جونىندەگى ورىنباسارى تەمىرتاس ىبرايەۆ.

 تەمىرتاس ىبرايەۆ، كومانديردىڭ تاربيە جانە يدەولوگيالىق جۇمىستار جونىندەگى ورىنباسارى:

- مەن ءوزىمدى كەرەمەت كاسىبي مامانمىن دەپ ەسەپتەمەيمىن. ويتكەنى كاسىپتى جەتىلدىرۋدە شەك بولمايدى. ۇيرەنگەن سايىن ۇيرەنۋگە ۇمتىلۋ كەرەك.

 اۋە بازاسىنىڭ تاڭداۋلى ەسكادريلياسى توپتانىپ ۇشاتىن كورىنىستى پىسىقتاپ جاتىر. ەكيپاج قۇرامىندا كىلەڭ مىقتىلار. اقتاۋداعى اسكەري تەڭىز وقۋ ورتالىعىنىڭ اسكەريلەرى دە شەرۋگە شىعادى. ەلىمىزدە بالاماسى جوق وقۋ ورنىنان 70 ازامات پارادقا قاتىسپاق. مۇندا مەحانيك، بايلانىسشى، ارتيللەريستەر مەن وزگە دە تەڭىز سالاسىنىڭ ماماندارى وقىپ جاتىر.

 سامات داستان -  تۇرىك اسكەري تەڭىز ۋچيليشەسىنىڭ تۇلەگى. قىزمەت ءوتىلىن «وجەت» كۇزەت كاتەرىندە باستاپ، كەيىن ىزدەۋ- قۇتقارۋ جانە سۋعا سۇڭگۋ قىزمەتىنە جەتەكشىلىك ەتەدى. قازىر اسكەري تەڭىز وقۋ ورتالىعىن باسقارادى.

سامات داستان، ق ر ءا ت ك وقۋ ورتالىعىنىڭ باسشىسى:

- كەمەلەردە نەشە ءتۇرلى ءورت جاعدايلارى شىعىپ قالۋى مۇمكىن. ەلەكتر قۇرالدارىنىڭ جانۋىنا نەمەسە تەڭىزدە كەتىپ بارا جاتقان كەزدە سۋ قۇبىرلارىنىڭ جارىلۋىنا بايلانىستى تاجىريبەلەرىن ارتتىرۋ ماقساتىندا وقۋ- جاتتىعۋ ستانساسىندا ولاردىڭ الدىن الۋ ءۇشىن ءبىز تاجىريبەلىك ساباقتار بەرەمىز. جاتتىعۋعا دەيىن دارىگەرلىك تەكسەرىستەن وتكەن تەڭىزشىلەر ارنايى كوستيۋممەن ستانساعا كىرەدى. كەمەنىڭ ويىلعان جەرىن اعاش تاقتامەن بىتەۋ ەكى مينۋتتان اسپاۋى كەرەك. بۇدان سوڭ تەڭىزشىلەر ستانسانىڭ جالىن شىققان بولىمىندە ءتىلسىز جاۋدىڭ بەتىن قايتارادى.

ايدىن پشايەۆ، «قازاقستان» زىمىراندى- ارتيللەريالىق كەمەسىنىڭ باس ستارشيناسى:

 - اسكەري تەڭىزشى بولعاندىقتان ءبىزدىڭ كەمەدە ءورت ءسوندىرۋ، سۋدان قورعاۋ ەسەپتەرى بار. ولاردىڭ كاسىبي شەبەرلىكتەرىن ارتتىرۋ ءۇشىن وسىنداي وقۋ- جاتتىعۋ ستانساسىنا كەلىپ تاجىريبەمىزدى ارتتىرامىز. اسكەري تەڭىز وقۋ ورتالىعىنىڭ اۋماعىندا ورنالاسقان كەشەندە جىلىنا ەكى جۇزدەي جاتتىعۋ شاراسى وتكىزىلەدى. كەلەشەكتە قۇرلىقتاعى اسكەري بولىمدەر ساربازدارىن دا وقىتۋ جوسپاردا بار.

www.khabar.kz