دينارا ءسادۋاقاسوۆا ءبىر مەزەتتە 70 اداممەن شاحمات وينادى
باستاپقىدا 30 شاحمات تاقتاسىندا ويىن وتكىزۋ جوسپارلانعان ەدى. الايدا، 70 اۋەسقوي شاحماتشى داڭقتى سپورتشىمەن ءبىر مەزەتتىك ويىن وتكىزۋ مۇمكىندىگىنە يە بولدى.
جالپى، دينارامەن شاحمات ويناعىسى كەلگەن ادامداردىڭ سانى 100 دەن اسىپ جىعىلدى. وسىلايشا، 2 ساعاتقا جوسپارلانعان شارا 4,5 ساعاتقا سوزىلدى. ويىن سوڭىندا قاتىسۋشىلارعا دينارا ەستەلىك سىيلىقتار تابىستادى.
«مۇنداي ءبىر مەزەتتىك ويىندار اۋەسقوي شاحماتشىلار اراسىندا ءار ۋاقىتتا زور تانىمالدىققا يە. دەگەنمەن، بۇگىنگى ويناعىسى كەلگەندەر سانى ءبىزدىڭ كۇتكەنىمىزدەن دە اسىپ ءتۇستى. ەرەسەكتەردىڭ دە بالالارمەن بىرگە بارىنشا قىزىعۋشىلىق تانىتقانى تاڭ قالدىردى. ءتىپتى كەيبىرى ويىنعا ىلىگۋ ءۇشىن تىم ەرتە كەلىپ تە الىپتى. جىل سايىن قازاقستاندىقتاردىڭ اراسىندا شاحماتقا دەگەن سۇيىسپەنشىلىكتىڭ ارتىپ كەلە جاتقاندىعى قۋانتادى»، - دەدى دينارا ءسادۋاقاسوۆا.
اۆتور: مارلان جيەمباي
