الەمدە 70 كە جۋىق كوشە قازاقشا اتالادى
ق ر س ءى م مالىمەتىنشە، الەمدە وسىنداي 70 كوشە بار، دەپ حابارلايدى BNews.kz.
كورشى رەسەيدىڭ 14 قالاسىندا كوشەلەرگە قازاقستان قالالارىنىڭ اتاۋلارى مەن ءبىزدىڭ ايگىلى قايراتكەرلەردىڭ ەسىمدەرى بەرىلگەن. ساراتوۆتا اقتوبە داڭعىلى، اقتوبە جولى بار. تۇمەندە قاراعاندى جانە قازاقستان كوشەلەرى ورنالاسقان. سوڭعىسى ومبىدا دا بار. قازاقستاننىڭ العاشقى استاناسى - ورىنبوردا كوشەلەرگە اقتوبە، الما- اتا، التىنسارين، جانگەلدين، قازاق جانە قاراعاندى اتاۋلارى بەرىلگەن. استراحاندا قوناقتار مەن تۇرعىندار ارال، بالقاش، جامبىل، قازاقستان، تۇركىستان، سەلينوگراد، قوستاناي جانە الما- اتا كوشەلەرىمەن كۇندە جۇرەدى. رەسەي فەدەراتسياسىنىڭ استاناسى - ماسكەۋدە كونە داڭعىلداردىڭ كەيبىرەۋى ۇلى وتان سوعىسى باتىرلارىنىڭ ەسىمدەرىمەن اتالادى. مۇندا ءاليا مولداقۇلوۆا جانە ي. ۆ. پانفيلوۆ، الما- اتا جانە قوستاناي كوشەلەرى بار.
بۇدان باسقا، نيەۆەلدە يبراگيم سۇلەيمەنوۆ، مانشۇك مامەتوۆا، پەرمدە، زەلەنوگرادتا جانە ناحابينو كەنتىندە - ي. ۆ. پانفيلوۆ، سانكت- پەتەربوردا - جامبىل جابايەۆ جانە ءاليا مولداعۇلوۆا، التاي رەسپۋبليكاسىنىڭ قوساعاش قالاسىندا - اباي، سامارادا - الما- اتا جانە روستوۆ- نا- دونۋدا - قازاق داڭعىلى ورنالاسقان.
وزبەكستان استاناسى - تاشكەنتتە وسىنداي 6 كوشە بار. ولار - مۇحتار اۋەزوۆ، اباي قۇنانبايەۆ، جامبىل جابايەۆ كوشەلەرى، سونداي- اق سايرام، شىمكەنت جانە قوستاناي داڭعىلدارى. قىرعىزستاندا اباي قۇنانبايەۆ، مۇحتار اۋەزوۆ، شوقان ءۋاليحانوۆ جانە ي. ۆ. پانفيلوۆتىڭ ەسىمدەرى قۇرمەتتەلەدى. تۇركىمەنستانداعى اكداش كەنتىندە دە ايگىلى اقىن، جازۋشى - اباي قۇنانبايەۆتىڭ ەسىمى بەرىلگەن كوشە بار. تاجىكستاندا تار كوشەلەردە شىمكەنت، كازاكون جانە كازاكو اتاۋلارى جازىلعان تاقتاشالار ىلىنگەن.
قازاقشا اتاۋلار تەك جاقىن شەتەلدە عانا ەمەستىگىن اتاپ وتكەن ءجون. ءۇندىستان مەن گەرمانيادا - اباي قۇنانبايەۆ، ۆەنگريا استاناسى بۋداپەشتە - استانا، مىسىردا - اباي، تۇركيادا - قازاقستان جانە پولشادا - قازاق كوشەسى بار.
