شپەكبايەۆ قازاقستاننان شەتەلگە 70 ميلليارد تەڭگەنى شىعارعاندار تۋرالى ايتىپ بەردى
دەپ حابارلايدى قازاقپارات.
«سوڭعى بەس جىلدا سىبايلاس جەمقورلىق قىلمىستارىنىڭ سالدارىنان قازاقستاننان 70 ميلليارد تەڭگەدەن استام قارجى شىعارىلدى. وسى قىلمىسقا قاتىستى 47 ادامعا حالىقارالىق ىزدەۋ جاريالانىپ، 28- ءى تابىلىپ، قازاقستانعا ەكستراديتسيالاندى. وسى رەتتە بۇگىنگى وتىرىسقا قاتىسىپ وتىرعان ءبىرقاتار ارىپتەستەرىمە العىسىمدى ايتقىم كەلەدى. ولار قۇقىقتىق كومەك اياسىندا قىلمىسكەرلەردى ەلىمىزگە ەكستراديتسيالاۋعا قولداۋ جاسادى»، - دەدى شپەكبايەۆ.
بۇدان بولەك ول وتىرىس بارىسىندا تىلشىلەر ساۋالىنا جاۋاپ بەرۋ كەزىندە قازاقستاننان شەتەلگە زاڭسىز شىعارىلعان اقشانى قايتارۋ بويىنشا باس پروكۋراتۋرا مەن اگەنتتىك تاراپىنان ءتيىستى شارالار اتقارىلىپ جاتقاندىعىن اتاپ ءوتتى.
«كەتكەن شىعىن بار (70 ميلليارد تەڭگە)، بۇگىندە ونىڭ 20 پايىزىنىڭ ورنى تولتىرىلدى. كەتىپ قالعاندارعا قاتىستى الداعى ۋاقىتتا قايتارۋ جۇمىستارى مەن ءتيىستى ەكستراديتسيالاۋ شارالارى ىسكە اسىرىلۋدا. اتاپ ايتقاندا، زاڭسىز اۋدارىمدار مەن وسى جولمەن شەتەلدە ساتىپ الىنعان مۇلىككە تىيىم سالۋ شاراسى قولدانىلىپ، سايكەسىنشە بۇل قارجى قازاقستانعا قايتارىلادى»، - دەدى شپەكبايەۆ.
اۆتور: رۋسلان عابباسوۆ
