دەنساۋلىق ساقتاۋ مينيسترلىگى جىل سايىن 70 ادامدى كۆوتامەن شەتەل اۋرۋحانالارىنا جىبەرەدى
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگ بارىسىندا ۆەدومستۆونىڭ ۆيتسە-ءمينيسترى الەكسەي سوي ءمالىم ەتتى.
ونىڭ ايتۋىنشا، بۇرىنعىداي ەمەس، قازىر قازاقستاننىڭ مەديتسيناسى جاقسارعان، سوندىقتان، كوپتەگەن اۋرۋ تۇرلەرى ەلىمىزدە دە ەمدەلەدى. ايتسە دە، كەيبىر سيرەك كەزدەسەتىن سىرقاتقا شالدىققان نەمەسە كۇردەلى وپەراتسيا جاساتۋعا مۇقتاج ادامداردى مينيسترلىك كۆوتامەن شەتەل اۋرۋحانالارىنا جىبەرىپ وتىرادى.
«وزدەرىڭىز بىلەسىزدەر، قازىر قازاقستاننىڭ مەديتسيناسى دامىعان، ءبىزدىڭ ەلدىڭ اۋرۋحانالارى مەن كلينيكالارى كوپتەگەن اۋرۋلاردى جازىپ، كۇردەلى وپەراتسيالاردى جاساي الادى. ءتىپتى، سوڭعى بىرنەشە جىلدا دونور تاۋىپ، ورگانداردى ترانسپلانتاتسيالاۋ قولجەتىمدى بولدى. قاجەتتى قۇرالدار، مەديتسينالىق وزىق تەحنولوگيالار جەتەرلىك. ايتسە دە، ۇكىمەت بەكىتكەن ءبىرقاتار باعىتتار بار. حالىق اراسىندا انىقتالعان اۋرۋلاردىڭ تىزىمىنە سايكەس، كۆوتا بويىنشا جىلىنا 50-70 ادامدى شەتەل اۋرۋحانالارىنا جىبەرەمىز. بۇل ءتىزىم شەكتەۋلى، ازاماتتارىمىزدىڭ كوبى ءبىزدىڭ مەديتسينانىڭ ارقاسىندا تولىق ەمدەلە الادى»، - دەپ ءتۇسىندىردى ۆيتسە-مينيستر.
اۆتور: كەنجەكەي توقتامۇرات قىزى