اناسىنا جازعان حات 70 جىل بويى جەزدىڭ ىشىندە ساقتالىپتى

سۇراپىل سوعىس اياقتالعالى 70 جىل وتسە دە ءىز-ءتۇزسىز كەتكەندەردىڭ دەرەگى ءالى دە شىعىپ جاتىر. كەي بوزداقتاردىڭ ۇرپاقتارى اتالارىنىڭ سۇيەگىن ەلگە اكەلىپ ارۋلاپ كومسە، ەندى بىرەۋلەرىنىڭ ۇل-قىزدارى مەن نەمەرەلەرى اتاسى جاتقان جەرگە كوك تاس قويىپ، قۇران باعىشتاپ قايتۋدا. ءجون-اق. تاعدىردىڭ جازۋىمەن جات توپىراقتا تالقانى تاۋسىلعان جاۋىنگەرلەردىڭ ءتۇبى ەسكەرۋسىز قالماعانى كوڭىلگە مەدەت.

جۋىردا شىمكەنت قالاسىنداعى «وتىرار» وبلىستىق عىلىمي-امبەباپ كىتاپحاناسىندا باۋىرلارى مەن اتالارىنىڭ دەرەگىن تاپقاندار باس قوستى. ۇلى جەڭىستىڭ 70 جىلدىعىنا وراي «ەلىمەن قايتا قاۋىشقاندار: سوعىس جاڭعىرىعى» دەگەن اتپەن ۇيىمداستىرىلعان كەزدەسۋدەن جاستار مول تاعلىم العانداي.

- باۋىرىمىز قاسىمبەك نۇرسەيىتوۆ وڭتۇستىك قازاقستان وبلىسىنان اتتانعان 8- اتقىشتار ديۆيزياسىندا تانك ۆزۆودى كومانديرى بولىپتى. سول كەزدە جيىرماعا دا تولماعان جاس كومانديردىڭ شەنى لەيتەنانت ەكەن. لاتۆياداعى ۇرىستاردىڭ بىرىندە قازا تاپقان. بىرەر جىل بۇرىن ونىڭ مۇردەسىن تاۋىپ، تولەبي اۋدانى قاراقيا اۋىلىنا اكەلىپ، شاريعات تالاپتارىنا ساي قايتا جەرلەدىك، - دەيدى مارقۇمنىڭ ءىنىسى جامبىل نۇرسەيىتوۆ.

ال، سوزاق اۋدانىنداعى ابدىشۇكىروۆتەر وتباسىنان سوعىسقا ءۇش بىردەي ازامات اتتانىپتى. ولار - اعالى-ءىنىلى سارسەن مەن جۇمابەك جانە سارسەننىڭ 19 جاسار ۇلى سەيدۋالى. وكىنىشكە قاراي، ۇشەۋى دە حابار-وشارسىز كەتكەن. تەك 2014-جىلى شىلدە ايىندا سانكت-پەتەربۋرگ قالاسىنىڭ ماڭىندا جۇرگىزىلگەن ارحەولوگيالىق قازبا جۇمىستارى كەزىندە سەيدۋالى سارسەن ۇلى ابدىشۇكىروۆتىڭ سۇيەگى تابىلدى. قابىردە جاتقان گيلزانىڭ ىشىندە سەيدۋالىنىڭ اناسى جىبەككە ارناپ جازعان، الايدا ەلگە جولداپ ۇلگەرمەگەن حاتى ساقتالىپتى.

- اعام سەيدۋالى سوعىسقا بويداق شاعىندا كەتتى. ارتىنان ۇرپاق قالماعانىنا قاتتى قامىعاتىنمىن. سۇيەگى تابىلعانىن ەستىگەنىمدە باۋىرىم تىرىلىپ كەلگەندەي سەزىندىم. ال، اناما جازعان حاتىن قولىما العانداعى كوڭىل-كۇيىمدى ايتۋعا تىلىم جەتپەيدى... ايتەۋىر بالالارىمىز سۇيەگىن ەلگە اكەلىپ، مۇسىلمانشىلىق جولىمەن جەرلەگەنىنە شۇكىرشىلىك ەتەمىن. ول وتانىن قورعاۋ جولىندا شەيىت كەتتى. ەلى ءۇشىن مايداندا جانىن قيسا، ەر ازاماتقا مۇنان اسقان قانداي باقىت، قانداي ابىروي بولۋى مۇمكىن؟! بۇگىنگى ۇرپاق اتالارىنىڭ سول ەرلىگىنەن ونەگە السا، وتانىن تاپ سولارداي سۇيە بىلسە ەكەن، - دەيدى سەيدۋالىنىڭ قارىنداسى، بۇگىندە 80 نەن اسقان قانىمكۇل اجەي.

شاراعا دەرەگى تابىلعان مۇنان دا باسقا جاۋىنگەرلەردىڭ تۋعان-تۋىستارى مەن ۇرپاقتارى قاتىستى. سونىمەن قاتار وبلىستىق ارداگەرلەر كەڭەسىنىڭ ءتوراعاسى جەڭىسبەك ماۋلەنقۇلوۆ، و ق و قورعانىس ىستەرى جونىندەگى دەپارتامەنتىنىڭ ءبولىم باستىعى، پودپولكوۆنيك قاجىمۇقان شىنتايەۆ، جەڭىس مەرەكەسى قارساڭىندا سانكت-پەتەربۋرگتاعى زيراتتان ءبىر ۋىس توپىراق اكەلىپ، وبلىستىق تاريحي-ولكەتانۋ مۇراجايىنا تاپسىرعان جاس تۋريستەر ستانساسى ديرەكتورىنىڭ ورىنباسارى ساۋلە وماربايەۆا جانە تاعى باسقالار كەزدەسۋدە ءوز ويلارىن ورتاعا سالدى.

ايدار قۇلجانوۆ،

«وڭتۇستىك قازاقستان».