مۇناي باعاسى 70 دوللارعا دەيىن تومەندەيتىن بولسا، ۇكىمەت بيۋدجەتتىڭ قايتا ناقتىلاناتىنىن جوققا شىعارمايدى
بۇل تۋرالى بۇگىن ماجىلىستە «2015-2017 - جىلدارعا ارنالعان رەسپۋبليكالىق بيۋجەت تۋرالى» زاڭ جوباسىن تالقىلاۋ بارىسىندا دەپۋتاتتار ساۋالىنا جاۋاپ بەرگەن ۇكىمەت باسشىسى كارىم ءماسىموۆ ءمالىم ەتتى.
ايتا كەتەتىن جايت، تالقىلاۋ بارىسىندا دەپۋتات گالينا بايماحانوۆا يندۋستريالاندىرۋ ماسەلەسىنە توقتالا كەلە، ەلىمىزدە الداعى ۋاقىتتا كاسىپتىك- تەحنيكالىق ءبىلىم بويىنشا كادرلار دايارلاۋ قىسقارتىلاتىنىن جەتكىزدى. «بۇل ءۇش ەسەگە تومەندەيدى، ال جوعارى ءبىلىم بويىنشا قىسقارۋ 1,3 ەسەگە ازايادى. بۇعان سەبەپ نە؟» - دەدى دەپۋتات. ءوز كەزەگىندە ۇكىمەت باسشىسى يندۋستريالىق- يننوۆاتسيالىق دامۋدىڭ ءبىرىنشى بەسجىلدىعى جەلتوقسان ايىندا قورىتىندىلاناتىنىن اتاپ ءوتتى.
«ارينە، بۇل باعدارلامانىڭ جەتىستىگىلىگى بارشىلىق، قوسىمشا نازار اۋداراتىن تۇسىمىز دا جەتكىلىكتى. ەلباسى وسى جۇمىستار بويىنشا ءوز باعاسىن بەرەدى، ۇكىمەت پەن ءتيىستى ۆەدومستۆولارعا، سوسىن الدىعا جاڭا مىندەتتەر جۇكتەيدى. ال كادرلار دايارلاۋ ماسەلەسىنە كەلسەك، بۇل - اسا ماڭىزدى ماسەلە. البەتتە، قوسىمشا رەسۋرستار بولعان جاعدايدا ءبىز وسى باعىتتى بۇرىنعىدان دا كۇشەيتەتىن ەدىك. ويتكەنى، ماكروەكونوميكالىق پارامەترلەردىڭ ناشارلاۋىمەن بايلانىستى، سوسىن ەلباسىنىڭ ۇلتتىق قوردان قوسىمشا قاراجات تارتۋ تۋرالى تاپسىرماسى بولماسا بيۋدجەت تومەندەپ كەتەتىن ەدى»، - دەدى كارىم ءماسىموۆ.
سونىمەن قاتار، ۇكىمەت باسشىسى ماۋسىم ايىندا بيۋدجەتپەن جۇمىستى ەندى قولعا العان تۇستا مۇناي باعاسىنىڭ باررەلى 115 دوللار بولعانىن، ال پارلامەنتكە بيۋدجەت وتكىزىلگەن تۇستا ول 90 دوللارعا تۇسكەنىن، قازىرگى تاڭدا باعا 80 دوللارعا دەيىن تومەندەگەنىن اتاپ ءوتتى.
«ەشكىم دە ماكرو ەكونوميكالىق ساياساتتىڭ قانداي بولاتىنىن، مۇناي مەن نەگىزگى مەتالدار قۇنى قالاي تۇراقتايتىنىن ءدوپ باسىپ ايتا المايدى. سوندىقتان دا، ەگەر مۇناي باعاسى 80 دوللاردان 70 دوللارعا دەيىن قۇلدىرايتىن بولسا، وندا سىزدەرگە تاعى كەلۋگە ءماجبۇر بولامىز، ونى جوققا شىعارا المايمىن. ال باعانىڭ كەلەر جىلى قالاي بولاتىنىن 2015 -جىلدىڭ ءبىرىنشى توقسانى كورسەتەدى»، - دەدى ك. ءماسىموۆ.
پرەمەر- مينيستر بۇل رەتتە ەلباسى تاپسىرماسىنا سايكەس، الەۋمەتتىك مىندەتتەمەلەردىڭ بارلىعى ورىندالاتىنىن، ال قالعان باعدارلامالار قايتا قارالۋى مۇمكىن ەكەنىن اتاپ ءوتتى.
«سوندىقتان دا، سۇراقتارعا جاۋاپ بەرە كەلە، ءبىزدىڭ ەكونوميكالىق احۋالىمىز جاقسارا تۇسسە، قوسىمشا قاراجاتتار تارتۋ مۇمكىندىگى پايدا بولسا، وندا كادرلاردى دايارلاۋ مەن قايتا دايارلاۋ ماسەلەسىن ءبىز تاعى دا قارايتىن بولامىز دەگىم كەلەدى»، - دەپ مالىمدەدى كارىم ءماسىموۆ.
اۆتور: قانات مامەتقازى ۇلى
