بيىل 700-دەن استام قانداس سولتۇستىك وڭىرلەرگە قونىس اۋدارۋعا ءوتىنىش بىلدىرگەن

استانا. قازاقپارات - سولتۇستىك وڭىرلەرگە قونىس اۋداراتىن قانداستارعا تۇرعىن ءۇي سەرتيفاكاتى بەرىلەدى. پرەمەر- مينيستر ءاليحان سمايىلوۆتىڭ ءماجىلىس دەپۋتاتتارىنىڭ ساۋالىنا بەرگەن جاۋابىندا وسىنداي مالىمەت ايتىلدى، دەپ حابارلايدى قازاقپارات.

«ەتنيكالىق كوشى- قوندى رەتتەۋ باعىتىنداعى ادىستەر قايتا قارالدى. حالىقارالىق تاجىريبەگە سۇيەنە وتىرىپ، شەتەلدە تۇراتىن ەتنيكالىق قازاقتاردىڭ قانداس مارتەبەسىن الۋعا ءوتىنىشىن سىرتقى ىستەر مينيسترلىگىنىڭ شەتەلدەگى مەكەمەسى ارقىلى «ءبىر تەرەزە» قاعيداتى بويىنشا قابىلداۋ مەحانيزمى ەنگىزىلدى. جاڭا مەحانيزم پيلوتتىق رەجيمدە ءبىرقاتار ەلدە ىسكە اسىرىلۋدا. ەتنيكالىق قازاقتار ەلگە كەلگەنگە دەيىن وزدەرى كەلەتىن وڭىرلەر بويىنشا، جۇمىس ورىندارى، بوس جەر ۋچاسكەلەرى، الەۋمەتتىك- ينفراقۇرىلىممەن قامتىلعاندىعى تۋرالى كونسۋلتاتسيا الادى»، - دەپ جازادى ۇكىمەت باسشىسى.

ءاليحان سمايىلوۆتىڭ سوزىنشە، 700-دەن استام قانداستان قازاقستاننىڭ سولتۇستىگىنە كوشۋ تۋرالى ءوتىنىش تۇسكەن.

«قازىرگى تاڭدا سولتۇستىك وڭىرلەرگە كوشۋ ءۇشىن 771 (237 وتباسى) ەتنيكالىق قازاقتان ءوتىنىش قابىلداندى. ونىڭ 368- ءى (111 وتباسى) رۇقسات الدى. بيىلدان باستاپ ولارعا تۇرعىن ءۇي الۋ ءۇشىن ەكونوميكالىق ۇتقىرلىق سەرتيفيكاتى قوسىمشا ۇسىنىلادى (ساتىپ الۋ، سالۋ، العاشقى جارنا الۋ). سەرتيفيكات قونىس اۋدارۋشىنىڭ/قانداستىڭ وزىنە بەرىلەدى. بۇل ازاماتتارعا ءوز بەتىنشە سولتۇستىك وڭىرلەردە تۇرعىن ءۇي تاڭداۋىنا مۇمكىندىك بەرەدى»، - دەلىنگەن جاۋاپتا.

پرەمەر- مينيستر ۇسىنعان انىقتاما دەرەگىندە اتالمىش سەرتيفيكاتقا بيىل بيۋدجەتتەن 10,1 ميلليارد تەڭگە بولىنگەنى ايتىلعان. ول اقشانىڭ زاڭدى جولمەن تاراتىلۋىن جوعارى اۋديتورلىق پالاتا قاداعالايدى.