ەلوردادا پيروتەحنيكانى زاڭسىز ساتۋ فاكتىسى تىركەلىپ، 700-دەن استام بۇيىم تاركىلەندى
نۇر-سۇلتان. قازاقپارات - جاڭا جىل قارساڭىندا ەلوردالىقتارعا پيروتەحنيكا بۇيىمدارىن قاۋىپسىز قولدانۋدىڭ ەرەجەسى ءتۇسىندىرىلىپ جاتىر، دەپ حابارلايدى قازاقپارات ءتىلشىسى.
«15-جەلتوقسان مەن 12-قاڭتار (2022 -جىل) ارالىعىندا ەلوردادا «پيروتەحنيكا» جەدەل پروفيلاكتيكالىق شاراسى ءوتىپ جاتىر. ماقسات - پيروتەحنيكالىق بۇيىمداردى قولدانعان كەزدە قاۋىپسىزدىكتى ساقتاۋ. اتالعان شارا باستالعالى قالا اۋماعىنان پيروتەحنيكانى زاڭسىز ساتۋدىڭ 7 فاكتىسى تىركەلىپ، ناتيجەسىندە 700-دەن استام پيروتەحنيكالىق بۇيىم تاركىلەندى. وزدەرىڭىز بىلەسىزدەر، پيروتەحنيكانى دۇرىس قولدانباسا ونىڭ ارتى ورتكە ۇلاسۋى نەمەسە ادامنىڭ دەنساۋلىعىنا زيان كەلتىرۋى ابدەن مۇمكىن. ونداي جاعدايلار بار»، - دەدى نۇر-سۇلتان قالاسى پوليتسيا دەپارتامەنتىنىڭ ەرەكشە تاپسىرما جونىندەگى اعا ينسپەكتورى ازامات امەن ەلوردا اكىمدىگىندە ونلاين وتكەن باسپا ءسوز ءماسليحاتىندا. پوليتسيا وكىلى پيروتەحنيكانى قولدانۋعا ساق بولۋعا جانە ونى بالالارعا بەرمەۋگە شاقىردى.
«پيروتەحنيكالىق بۇيىمداردى قولدانۋداعى قاراپايىم ەرەجەلەر ادامنىڭ ءومىرىن قۇتقارۋى مۇمكىن. سوندىقتان قاراپايىم ەرەجەلەردى ساقتاۋعا شاقىرامىز. جالپى وتشاشۋدى ساتۋعا ارنايى رۇقساتى بار دۇكەننەن العان ابزال. پيروتەحنيكانىڭ قولدانۋ مەرزىمى بولاتىنىن دا ۇمىتپايىق. تاعى ءبىر ماڭىزدى جايت، ساتۋشى پيروتەحنيكانى قولدانۋ تۋرالى كەڭەس بەرۋگە مىندەتتى. سونىمەن قاتار تۇتىنۋشى ساتىپ الۋشىدان پوليتسيا دەپارتامەنتىنىڭ رۇقساتىنىڭ بارىن سۇراۋعا قۇقىلى»، - دەيدى ول. بۇعان دەيىن قالالىق ت ج د وكىلى ەلوردادا جاڭاجىلدىق كەش وتكىزەتىن مەيرامحانا يەلەرىنە قاۋىپسىزدىك ەرەجەسىن ءتۇسىندىردى.
اۆتور: ءالي يبرايەۆ
