ەلوردادا ءبىر تاۋلىكتە 700 دەن استام جول ەرەجەسىن بۇزۋ فاكتىسى انىقتالدى

نۇر-سۇلتان. قازاقپارات - جول-كولىك وقيعالارىنىڭ سانىن ازايتۋ، سونداي-اق جول قوزعالىسى ەرەجەلەرىن بۇزۋدىڭ الدىن الۋ ماقساتىندا نۇر-سۇلتان قالالىق پوليتسيا دەپارتامەنتى 8-17-قاراشا ارالىعىندا «قاۋىپسىز جول» جەدەل الدىن الۋ شاراسىن وتكىزەدى، دەپ حابارلايدى قازاقپارات ەلوردالىق پ د باسپا ءسوز قىزمەتىنە سىلتەمە جاساپ.

ءبىر تاۋلىك ىشىندە پوليتسيا قىزمەتكەرلەرى 710 جول ەرەجەسىن بۇزۋ فاكتىسىن انىقتادى، ونىڭ ىشىندە بىرەۋىن قوعامدىق كولىك جۇرگىزۋشىسى جاساعان. 53 جۇرگىزۋشى تەحنيكالىق تەكسەرىستەن وتپەگەن كولىكتى جۇرگىزگەن، مانيەۆر جاساۋ ەرەجەلەرىن بۇزعانى ءۇشىن 25 جۇرگىزۋشى ۇستالدى. سونىمەن قاتار، 11 جۇرگىزۋشى قارسى جولاققا شىعىپ كەتسە، 16 جۇرگىزۋشى باعدارشامنىڭ تىيىم سالىنعان تۇسىنە ءوتىپ كەتكەن.

ماس كۇيىندە كولىك جۇرگىزگەنى ءۇشىن 16 جۇرگىزۋشى ۇستالدى، كولىك قۇرالدارىن باسقارۋ قۇقىعى جوق 6 ازامات تەمىر تۇلپاردى تىزگىندەگەن. ايىپ تۇراعىنا 52 اۆتوكولىك قويىلعان.

پوليتسيا قىزمەتكەرلەرى ماس كۇيىندە كولىك قۇرالدارىن باسقارۋ فاكتىسىن انىقتاۋعا جانە ونىڭ جولىن كەسۋگە ەرەكشە نازار اۋدارىپ جاتىر.