ماحامبەت دوسمۇحامبەتوۆ: سارايشىققا جىلىنا 700 مىڭ تۋريست تارتامىز
بۇل تۋرالى اتىراۋ وبلىسىنىڭ اكىمى ماحامبەت دوسمۇحامبەتوۆ «ۇلىق ۇلىس - التىن وردا» اتتى حالىقارالىق كونفەرەنسيادا ايتتى.
«اتىراۋ وبلىسىنىڭ الەۋمەتتىك- ەكونوميكالىق دامۋ ماسەلەلەرى جونىندەگى كەڭەستە مەملەكەت باسشىسى قاسىم- جومارت كەمەل ۇلى سارايشىقتىڭ ماڭىزى مەن تانىمالدىعىن ارتتىرۋ ءۇشىن زاماناۋي تۋريزم ينفراقۇرىلىمىن سالۋدى تاپسىرعان. سان سالانىڭ ماماندارىن جۇمىلدىرۋ ارقىلى «سارايشىق قالاشىعىنىڭ» جوباسى جاسالدى. جوسپار بويىنشا كەشەن اۋماعىندا 20 شاقتى نىسان بوي كوتەرەدى. سونىڭ ىشىندە «جايىقتان وتەر جىلجىمالى جۇزبەلى كوپىردى» ەرەكشە اتاپ ءوتۋىمىز كەرەك»، - دەگەن ايماق باسشىسى اسپالى كوپىرمەن يبن باتتۋتانىڭ جايىقتان ءجۇزىپ وتكەنى تۋرالى تاريحي دەرەكتەر بار ەكەنىن ەسكە سالدى.
ايتۋىنشا، يبن باتتۋتانىڭ ەستەلىگىندە سارايشىق اۋماعىندا «وردا بازاردىڭ» دا بولعانى اڭىز بولىپ ايتىلادى. سوندىقتان بۇل كيەلى مەكەندى ساۋدا ورتالىعى رەتىندە دامىتۋ اسا ماڭىزدى.
«بۇگىندە سارايشىق مۋزەي قورىعىنىڭ قورىندا 4600 جادىگەر ساقتاۋلى. ونىڭ 400-دەيى عانا كورىنىسكە شىعارىلعان. وسى جاعداي جاڭا «التىن وردا» مۇراجايىن سالۋعا نەگىز بولىپ وتىر. سارايشىق زامانىندا قولونەرشىلەر وشاعى بولعان. ال قازىرگى تاڭدا وڭىرىمىزدە 200-گە جۋىق قولونەرشى بار. بۇل ءداستۇردى دە قايتا جاڭعىرتۋىمىز كەرەك»، - دەدى وبلىس اكىمى.
سونداي- اق، ول الەمگە ايگىلى بولعان سارايشىق باعىن ەسكە سالاتىن ساياباق اشىلاتىنىن اتادى.
«كەشەن ىشىندە جىلقى، تۇيەمەن سەيىل قۇرۋ جانە جايىق وزەنىندە التىن قايىقپەن سەرۋەندەۋ كوپشىلىكتىڭ قىزىعۋشىلىعىن وياتاتىن جوبا بولماق. سونداي- اق، بۇل جەردە حالقىمىزدىڭ ەتنومادەنيەتىنە نەگىزدەگەن ۇلتتىق ويىندار جانە مادەني- بۇقارالىق شارالار وتكىزىلەدى. بۇل جوبالارعا شاعىن جانە ورتا بيزنەس وكىلدەرىن تارتۋ جوسپاردا بار. قازىرگى تاڭدا سارايشىق مەموريالدى كەشەنىنە كەلۋشىلەردىڭ سانى 20 مىڭعا جۋىق. جوبا ىسكە قوسىلعان جاعدايدا تۋريستەر سانى 700 مىڭعا دەيىن ارتادى دەگەن بولجام بار. سونداي- اق، جۇزدەگەن جۇمىس ورنى اشىلادى»، - دەدى ماحامبەت دوسمۇحامبەتوۆ.
اۆتور: ەسىمجان ناقتىباي
