پەتروپاۆلدا 700 جەر ءۇي سۇرىلەدى
پەتروپاۆل قالاسى اكىمدىگىنىڭ مالىمەتىنشە، بۇگىن اپپارات كەڭەسىندە تۇرعىن ۇيلەردى بۇزۋ بويىنشا جوسپارلانعان جۇمىستار تالقىعا ءتۇستى.
جىل باسىنان مەملەكەتتىك قاجەتتىلىك ءۇشىن 468 جەر ۋچاسكەسى جانە جىلجىمايتىن مۇلىك يەلىكتەن شىعارىلدى. جالپى بيىل بارلىعى 700 تۇرعىن ءۇيدى بۇزۋ جوسپارلانعان. ءسۇرىلىپ جاتقان جەكە تۇرعىن ۇيلەردىڭ باسىم بولىگى ەسكىرگەن. ولاردىڭ بۇرىنعى يەلەرىنىڭ %90 كوپقاباتتى ۇيلەردەن پاتەرلەردى تاڭدادى. وسىلايشا، 423 وتباسى وزدەرىنىڭ تۇرعىن ءۇي جاعدايلارىن جاقسارتىپ وتىر.
«كوپپاتەرلى تۇرعىن ۇيلەردىڭ قۇرىلىسىن جۇرگىزۋ ءۇشىن «جاس وركەن» شاعىناۋدانىنىڭ گوركي- التىنسارين- پوزولوتين، گوركي- يسمايلوۆ- التىنسارين كوشەلەرى شەكاراسىندا، «ورتالىق» شاعىناۋدانىنىڭ برۋسيلوۆسكي- استانا، «كوپاي» شاعىناۋدانىنىڭ جۇمابايەۆ- كرەپوستنايا كوشەلەرى شەكاراسىندا جەكە تۇرعىن ۇيلەر بۇزىلادى. جۇمىستار جوسپارعا سايكەس جۇرگىزىلىپ جاتىر»، - دەلىنگەن حابارلامادا.
كەلەر جىلى پەتروپاۆلدا بۇل جۇمىستار جالعاسىن تاپپاق. جەكە تۇرعىن ۇيلەر قۇرىلىستى جانداندىرۋ ءۇشىن «جاس وركەن»، «ورتالىق»، «كوپاي»، «بەرەكە» شاعىناۋداندارىندا جالعاسادى.
