تەمىرتاۋدا 700 دەن اسا ساياجاي ورتەنىپ كەتتى

نۇر-سۇلتان. قازاقپارات - تەمىرتاۋداعى ساياجايلار اۋماعىندا بولعان ءىرى ورتتەن قانشا شىعىن كەلگەنى ازىرگە بەلگىسىز.

ورتەنگەن ۇيلەر مەن شارۋاشىلىق نىسان يەلەرىنە جانە ءورت كەزىندە زارداپ شەككەندەرگە وتەماقى تولەنە مە، ول جاعى دا ازىرگە ايتىلمايدى. الدىن الا دەرەك بويىنشا، 700 دەن استام يەسىز ساياجاي مەن ادامدار تۇرىپ جاتقان 20 شاقتى ءۇي ورتەنگەن.

ءورتتى ءسوندىرۋ كەزىندە تابىلعان ەكى ايەل (1932 جانە 1936 -جىلى تۋعان) قازىرگى كەزدە ەم قابىلداپ جاتىر. بەتى مەن قولى كۇيىپ، جاراقات العان 83 جاستاعى تۇرعىن ءوزىن اۋرۋحاناعا جاتقىزۋدان باس تارتقان.

توتەنشە جاعداي دەپارتامەنتى دەرەگىنشە، نەگىزگى كۇش ستانسياداعى تۇرعىن ۇيلەر مەن تەمىر جولداردى، جاڭا اۋىل ستانسياسىنداعى نىساندار مەن قوسالقى ەلەكتر ستانسيالارىن قورعاۋعا جۇمسالعان. ءورت سەبەبى انىقتالىپ جاتىر.

الدىن الا دەرەك بويىنشا، ساياجايلار اۋماعىندا دانەكەرلىك جۇمىستار جۇرگەن. توتەنشە جاعداي قىزمەتىنە «مەتاللۋرگ ك م ك» باعباندىق سەرىكتەستىگى اۋماعىندا ءورت بولىپ جاتقانى تۋرالى حابارلاما 29 -تامىز كۇندىز تۇسكەن. ساياجايلار، دالا، قامىس ورتەنگەن. قاتتى جەل بولىپ، اينالاعا ءتۇتىن جايىلىپ، ءورت سوندىرۋشىلەردىڭ جۇمىسى قيىنداعان. ءورت سول كۇنى تۇندە سوندىرىلگەن.