ءمادينا ءابىلقاسىموۆا بيىل 700 مىڭ ادامدى جۇمىسقا ورنالاستىرماق
«2017 -جىلدىڭ سوڭىندا ەلىمىزدەگى جۇمىسسىزدىق دەڭگەيى 4,9 پايىزدى قۇرادى. اتاپ ءوتۋ كەرەك، بۇل كورسەتكىش 7 جىلدىڭ ىشىندە 11 پايىزعا تومەندەدى. ءبىراق، جۇمىسسىزدىق دەڭگەيىن قاراستىرعاندا ەڭبەك نارىعىندا بولىپ جاتقان ۇردىستەردى دە ەسكەرگەنىمىز ءجون. جالپى العاندا ەڭبەك نارىعىندا جىل سايىن 2,2 ميلليوننان استام ادام اينالىمدا بولادى. ياعني، بىرەۋلەرى جۇمىسىن اۋىستىرسا، ەندى ءبىرى زەينەتكە شىعىپ جاتادى. تاعى ءبىرى العاش رەت ەڭبەك نارىعىنا قوسىلادى»، - دەدى مينيستر.
ونىڭ دەرەگىنشە، سوڭعى جىلدارى جىل سايىن 300 مىڭنان استام جاس ەڭبەك نارىعىنا قوسىلادى. ال 2021 -جىلعا قاراي ولاردىڭ سانى 1,3 ميلليونعا جەتپەك.
«سول سەبەپتەن مەملەكەتتىك باعدارلامالار اياسىندا كوپتەگەن شارالار جاستاردى جۇمىسقا ورنالاستىرۋعا باعىتتالىپ وتىر. ولاردىڭ ىشىندە ەڭ باستىسى «ناتيجەلى جۇمىسپەن قامتۋ» جانە «جاپپاي كاسىپكەرلىكتى دامىتۋ» باعدارلامالارى. اتالعان باعدارلامالار اياسىندا بىلتىر 572 مىڭ ادام جۇمىسقا ورنالاسىپ، بىلىمدەرىن جەتىلدىرۋ شارالارىنا تارتىلدى. ونىڭ ىشىندە تۇراقتى ەڭبەككە 318 مىڭ ادام ورنالاستىرىلدى. وسى جىلى ءبىز بۇل كورسەتكىشتى ەكى ەسە ارتتىرامىز. ءبىزدىڭ ماقسات - بيىل 700 مىڭ ادامدى جۇمىسقا ورنالاستىرىپ، ءبىلىمدى جەتىلدىرۋ شارالارىمەن قامتاماسىز ەتۋ. وسى شارالار جۇمىسسىزدىق دەڭگەيىن ءبىرقالىپتى ۇستاپ تۇرۋعا سەپتىگىن تيگىزەدى دەپ سەنەمىز»، - دەدى ءمادينا ءابىلقاسىوۆا.
اۆتور: مارلان جيەمباي
