الماتىدا العاش رەت ەكى الاڭدا وتەتىن ناۋرىز مەرەكەسىندە 700 ءارتىس ونەر كورسەتەدى
دەپ حابارلايدى قازاقپارات ءتىلشىسى.
الماتى قالاسى اكىمىنىڭ باسپا ءسوز قىزمەتىنىڭ حابارلاۋىنشا، «ۇلى دالانىڭ ناۋرىزى» مەرەكەلىك شاراسىنا 700 دەن استام ءارتىس قاتىسادى، ولاردىڭ اراسىندا شىعارماشىلىق ۇجىمدار، اعاش اياقتار (حودۋليس) ، ءداستۇرلى تەاتر اكتەرلەرى، سوليستەر، بي توپتارى بار. بۇلاردان وزگە بۇقارالىق «كورىسۋ» بي فلەش- موبى دا وتەدى. كونسەرتتەرگە «ياللا» توبى، ايقىن تولەپبەرگەن، ءمولدىر اۋەلبەكوۆا، ءالي وقاپوۆ، الىشەر كاريموۆ، مارجان اراپبايەۆا، ينديرا ەدىلبايەۆا، «مۋزارت»، «ايۋمي»، «Voice» توپتارى، رامازان ستامعازيەۆ، جاسۇلان ساقايەۆ، نۇرجان جانپەيىسوۆ، ەركىن شۇكىمانوۆ، «سازگەن سازى» فولكلورلىق- ەتنوگرافيالىق ءانسامبلى، ايگۇل قوسانوۆا، «قوڭىر» توبى، «باقىت» بالالار حورى، «وتىرار سازى» فولكلورلىق - ەتنوگرافيالىق ءانسامبلى، «الاش ۇلى» توبى، «جورعا» بي توبى، «تۋعان جەر» بي ۇجىمى، «الان» توبى، ماليكا ەسمۇحانبەتوۆا، «مۋزارت لايف» توبى جانە باسقالارى قاتىسادى.
استانا الاڭىنا كيىز ۇيلەر، ءار ءتۇرلى قوستار، شاتىرلار تىگىلىپ، ناۋرىز تاقىرىبىنا وراي جاسالعان ينستاللياتسيالار ورناتىلادى. مەرەكەدە «مۇشەل» اتتى تەاترلاندىرىلعان كورىنىس كورسەتىلىپ، قازاقتىڭ كونەدەن كەلە جاتقان «سامالىق»، «تۇلىك جىرى» اتتى سالت- ءداستۇرلى، ريتۋالدى ءان- جىرلارى ورىندالادى. ال، اتلەتتەر اۋىلىنداعى مەرەكەلىك قويىلىم وتەتىن الاڭ تۇتاستاي جاڭا قونىستانعان قازاق اۋىلىن ەلەستەتەدى. الاڭنىڭ كىرەبەرىسىنە ەجەلگى ۇلگىدەگى قاقپا ورناتىلىپ، ونىڭ ەكى جاق شەتىنە كونە كۇيمە ۇستىنە تىگىلگەن 2 كيىز ءۇي قويىلادى.
«نوماد» كاسكادەرلار توبى «جىگىتتەر»، «قىز قۋۋ»، «اۋدارىسپاق»، «سەمسەرلەسۋ» كورىنىستەرى ارقىلى ءوز ونەرلەرىن كورسەتەدى. باعدارلاماعا «قوي كوتەرۋ»، «لاڭگى تەبۋ»، «ارقان تارتۋ» سياقتى شەبەرلىك پەن ەپتىلىكتى پاش ەتەتىن قازاق ۇلتتىق ويىندارى دا ەنگىزىلگەن. ەكى مەرەكەلىك الاڭدا دا مۋزىكا اسپاپتارىنىڭ، بۇركىت پەن تازىنىڭ كورمەسىن جانە دارشىلارى (كەرىلگەن ارقان ۇستىندە جۇرەتىندەر) مەن اعاش اياقتاردىڭ ونەرىن كورسەتۋ دە جوسپارلانعان. «ناۋرىز» مەرەكەسى بارىسىندا باۋىرساق پەن «ناۋرىز كوجە» تەگىن بەرىلەدى. مەرەكە سوڭى كەشكى باعدارلاما مەن وتشاشۋعا ۇلاسادى.
اۆتور: الماس مۇقاش
