تۇرمەدەن بوساپ شىققان 700 دەن استام قازاقستاندىق قالىپتى ومىرگە ورالدى
بۇل تۋرالى بۇگىن دوڭگەلەك ۇستەل بارىسىندا دەنساۋلىق ساقتاۋ جانە الەۋمەتتىك دامۋ مينيسترلىگى الەۋمەتتىك قىزمەتتەر دەپارتامەنتىنىڭ ديرەكتورى ايگۇل تابەرگەنوۆا ءمالىم ەتتى، دەپ حابارلايدى قازاقپارات.
«ارناۋلى قىزمەتتەر تۋرالى» زاڭعا سايكەس، باس بوستاندىعىنان ايىرۋ ورىندارىنان بوساپ شىققان ازاماتتار كۇردەلى ءومىر جاعدايىنا تاپ بولعاندار رەتىندە قاراستىرىلادى. ياعني، وسى ساناتتاعىلارعا بەلگىلى ءبىر مەملەكەتتىك قولداۋلار قاجەت. اعىمداعى جىلدىڭ باسىنان پروباتسيالىق قىزمەتتىڭ كومەگى ارقاسىندا ءبىز 731 تۇلعانى قوعامعا كىرىكتىرە الدىق. اتالعان ازاماتتار الەۋمەتتىك- قۇقىقتىق كومەكتەر اياسىندا جۇمىسقا ورنالاسىپ، ماماندىققا وقىدى، كەيبىرى قۇجاتتارىن قالپىنا كەلتىرسە، ءبىرقاتار ازاماتتار قاجەتتى مەديتسينالىق جانە پسيحولوگيالىق قىزمەتتەر كەشەنىن الدى»، - دەدى مينيسترلىك وكىلى.
ونىڭ ايتۋىنشا، تۇرمەدەن بوساپ شىققان ءبىرقاتار ازاماتتارعا باسپانامەن قامتۋ، ۋاقىتشا نەمەسە جالعا بەرىلەتىن باسپانالارعا ورنالاستىرۋ باعىتىندا دا كومەكتەر كورسەتىلگەن. ايتا كەتەرلىگى، «جۇمىسپەن قامتۋ» جول كارتاسى اياسىندا باس بوستاندىعىنان ايىرۋ ورىندارىنان بوساپ شىققانداردى جۇمىسپەن قامتۋعا ءبىرىنشى كەزەكتە باسىمدىق بەرىلەدى.
تۇتاستاي العاندا، اعىمداعى جىلدىڭ توعىز ايىندا بۇرىن سوتتى بولعان 28 مىڭنان استام ازاماتقا الەۋمەتتىك- قۇقىقتىق كومەكتەر كورسەتىلگەن.
اۆتور: قانات مامەتقازى ۇلى
