اقتوبەدە وتەتىن گىر كوتەرۋدەن الەم چەمپيوناتىنا 700 دەي سپورتشى كەلەدى

دەپ جازادى «اقتوبە» گازەتى.
وبلىس اكىمىنىڭ باسپا ءسوز قىزمەتىنىڭ حابارلاۋىنشا، گىر كوتەرۋ سپورتىنان الەم چەمپيوناتى قازان ايىنىڭ 26-30 - كۇندەرى «قونىس» سپورت سارايىندا وتەدى. دايىندىق جۇمىستارى تامىزدىڭ جيىرماسىنان باستالادى. ۇيىمداستىرۋ كوميتەتىنىڭ قۇرامىنا وبلىستىق فەدەراتسيا وكىلدەرى مەن دەنە شىنىقتىرۋ جانە سپورت باسقارماسىنىڭ قىزمەتكەرلەرى كىرەدى. چەمپيوناتقا 35 ەلدەن 700-گە تارتا سپورتشى قاتىسادى. قاتىسۋعا ءوتىنىش بەرۋ قىركۇيەكتىڭ ەكىنشى جارتىسىندا اياقتالادى.
جيىندا بەردىبەك ساپاربايەۆ شارانى جوعارى دەڭگەيدە وتكىزۋدى تاپسىردى.
- بۇل - وڭىردەگى سپورتتى دامىتۋعا جانە ىلگەرىلەتۋگە ىقپال ەتەتىن ماڭىزدى شارا. ءبىز چەمپيوناتتىڭ جوعارى دەڭگەيدە ءوتۋى ءۇشىن بار كۇشىمىزدى سالۋىمىز كەرەك، - دەدى ءوڭىر باسشىسى.
وبلىس اكىمى الەمدىك دەڭگەيدەگى سپورتتىق باسكەلەستىككە دايىندىق كەزىندە ەلىمىزدىڭ ۇلتتىق ەرەكشەلىگىن كورسەتۋ كەرەكتىگىن اتاپ ءوتتى.