ءسىبىر جاراسىنان كومىلگەن مالدىڭ 700 دەن استام ورنى بەلگىسىز كۇيدە قالىپ وتىر
بۇل تۋرالى بۇگىن «قازاقپارات» تىلشىسىنە بەرگەن رەسمي جاۋابىندا ق ر اۋىل شارۋاشىلىعى مينيسترلىگى ءمالىم ەتتى.
«ق ر اۋماعىندا ءسىبىر جاراسى بار 2604 سانيتارلىق اۋماق بار. ولاردىڭ ىشىندە 2016 -جىلدىڭ 15 -شىلدەسىندەگى جاعداي بويىنشا، 1890 قورىمنىڭ ناقتى ورىندارى انىقتالدى. سايكەسىنشە، 714 قورىم ءالى تابىلعان جوق. بۇل شامامەن %27,4»، - دەلىنگەن تىلشىگە بەرىلگەن جاۋاپتا.
مال كومىلگەن جەرلەردىڭ 702 سى (%37,1) قورشالماعان نەمەسە وندا ارنايى ەسكەرتۋ بەلگىلەرى ورناتىلماعان.
1232 جەر تۋرالى اقپارات اۆتوماتتاندىرىلعان اقپاراتتىق جەر كاداسترى مەملەكەتتىك جۇيەسىنە ەنگىزىلگەن.
جالپى ەل اۋماعىندا، مال كومىلگەن 3298 بيوتەرميكالىق قورىم بار.
بۇعان دەيىن حابارلاعانىمىزداي، 2016 -جىلدىڭ 8 -ماۋسىمى مەن 8 -شىلدەسى ارالىعىندا قازاقستان بويىنشا 16 ادام تۇينەمە جۇقتىرعان. الماتى وبلىسىندا - ءۇش ادام، شىعىس قازاقستان وبلىسىندا - ەكى ادام، قاراعاندى وبلىسىندا سەگىز ادام، پاۆلودار وبلىسىندا ءۇش ادام وسى اۋرۋمەن اۋىرعان. وكىنىشكە قاراي، قاراعاندى وبلىسىندا ەكى، پاۆلودار وبلىسىندا ءبىر ادام قايتىس بولدى. امان قالعان ون ءتورت ادامنىڭ سەگىزى قازىر اۋرۋحانادان شىققان، تاعى التى ادام ستاتسيوناردا ەم قابىلداۋدا.
مينيسترلىكتىڭ ءمالىم ەتكەنىندەي، 2016 -جىلى كوكتەم باسىندا بارلىق وڭىرلەردە ءسىبىر جاراسىنا قارسى ۆاكسينا ەگۋ 100 پايىز اتقارىلعان كورىنەدى.
«ۆاكسينالار ەلگە جەتكىزىلگەن كەزدە، ونى ەكپەس بۇرىن ۇلتتىق رەفەرەنتتىك ورتالىعى ونىڭ ساپاسىن ءجىتى تەكسەرۋدەن وتكىزەدى. ۆاكتسينا جەتكىزۋشەلەرى ونىڭ پاسپورتى مەن ساپا سەرتيفيكاتىن ۇسىنادى»، - دەلىنگەن حابارلامادا.
زەرتتەۋ ناتيجەسى كورسەتكەنىندەي، اتالمىش ۆاكتسينا بارلىق تالاپتارعا ساي بولىپ شىقتى. سونىمەن قاتار ۆاكسينالاردىڭ ساپاسىن انىقتاۋ ماقساتىندا ونىڭ ۇلگىلەرى رەسەي جانە ەۋروپاعا جولداندى.
اۆتور: جاسۇلان جولدىبايەۆ
