ەلوردا جولدارىندا 700 گە جۋىق بەينەكامەرا ورناتىلدى

استانا. قازاقپارات - استانا جولدارىندا ورناتىلعان بەينەكامەرالار قۇقىقبۇزۋشىلىقتاردى جازىپ الۋمەن قاتار، جۇرگىزۋشىلەردى تارتىپكە شاقىرادى، دەپ حابارلادى ەلوردا اكىمدىگىنىڭ سايتى.

جولداردىڭ قيىلىستارىندا «قىزىل ءتۇس» جانە ستوپ-سىزىقتاردى قيىپ وتۋشىلەردى تۇسىرەتىن 11 ينتەگرو كامەرا، 53 سكوروستەمەر ورناتىلدى. جالپى استانا جولدارىنا 694 كامەرا قويىلدى. كامەراعا جازىلعان بارلىق اقپارات جولداعى احۋالدى قارايتىن جەدەل باسقارۋ ورتالىعىنا جىبەرىلەدى. سونىمەن بىرگە، بەلدىك تاقپاۋ، رۋلدە وتىرىپ تەلەفونمەن سويلەسۋ، اۆتوكولىك تەرەزەسىنەن قالدىق تاستاۋ، رۇقسات ەتىلمەگەن جەرگە توقتاۋ جانە باسقا دا اكىمشىلىك قۇقىقبۇزۋشىلىقتار تاسپاعا تۇسەدى.

اكىمشىلىك قۇقىقبۇزۋشىلىق پەن ج ق و ەرەجەلەرىن بۇزعانى ءۇشىن بەينەجازبا مەن ناقتى ايىپپۇل كورسەتىلگەن ەسكەرتپە ەرەجە بۇزعان جۇرگىزۋشىنىڭ مەكەنجايىنا جىبەرىلەدى. ايىپپۇل تولەمەي اۆتوموبيلدى قايتا راسىمدەۋگە، تەحنيكالىق بايقاۋدان وتۋگە جانە باسقا دا ۇدەرىستەردەن وتۋگە جول بەرىلمەيدى.