ەرتىس وزەنىنىڭ 70 شاقىرىمىن 53 جاستاعى ازامات ءجۇزىپ ءوتتى

استانا. قازاقپارات- پاۆلودار وبلىسى،  شارباقتى اۋدانى تۇرعىنى ەرتىس وزەنى بويىمەن 70 شاقىرىم جەردى ءجۇزىپ وتۋگە دايىندالىپ جاتقانىن ايتقان  بولاتىنبىز.  وجەت ازامات سول ۋادەسىندە تۇردى.

ءومىرجان وشانوۆقا بۇل ماقساتىنا جەتۋ ءۇشىن 10 ساعات قاجەت بولعان. ول لەبياجى اۋدانى، جاڭاتاڭ اۋىلى تۇسىنان پاۆلودار قالاسىنا دەيىن ءجۇزىپ كەلدى.

سۋىق سۋدا اياقتارىنىڭ ءسىڭىرى تارتىلىپ، بىرنەشە رەت توقتادى. 53 جاستاعى ازامات جاستايىنان قازاقشا كۇرەسپەن اينالىسقان. قازىر اۋىل مەكتەبىندە دەنە تاربيەسى ءپانىنىڭ مۇعالىمى.

 ول 25 مەترلىك باسسەيىندە 4 ساعات بويى تولاسسىز ءجۇزۋدى ادەتكە اينالدىرعان. ال اعىندى سۋدا 10 ساعات جۇزگەنىن جەكە «رەكورد» دەپ ەسەپتەيدى. قالاي بولعاندا دا، كاسىبي سپورتشى بابىندا ەكەنىن دالەلدەپ بەردى. بۇل - استانا قالاسىنىڭ 16 جىلدىعى جانە II دۇنيەجۇزىلىك سوعىستىڭ 70 جىلدىعىنا تارتۋ.

ءومىرجان وشانوۆ، شارباقتى اۋدانىنىڭ تۇرعىنى:

 ءبىزدىڭ ەلباسىمىز قازاقستاندى بۇكىل ەلگە پاش ەتەمىن، دەيدى. وتىز دامىعان مەملەكەتتىڭ قاتارىنا كىرگىزەمىن، دەيدى. ءبىزدىڭ وليمپياداداعى سپورتشىلارىمىز ءارقايسىسى مەدال اكەلىپ قۋانتىپ جاتىر. بۇل -  مەنىڭ قازاق ەلىنە قوسقان ۇلەسىم دەپ ەسەپتەيمىن.

بولات امانبايەۆ

 «قازاقستان» تەلەارناسى