نۇر-سۇلتاندا 70 تەن استام ساۋدا ءۇيى تەكسەرىلىپ، 30 نىسانعا ەسكەرتۋ جاسالدى
«بۇگىن ءبىز تاعى ءبىر مونيتورينگ جۇمىسىن جۇرگىزدىك. مۇنداي تەكسەرۋلەر ساۋدا ورىندارى قايتا اشىلعان ساتتەن بەرى جۇرگىزىلىپ كەلەدى. مونيتورينگ توبىنىڭ نەگىزگى مىندەتى - باس مەملەكەتتىك سانيتارلىق دارىگەر بەلگىلەگەن سانيتارلىق تالاپتاردىڭ ساقتالۋىن باعالاۋ. ءبىر عانا 20-24 -مامىر ارالىعىندا ءتورت اۋداننىڭ مونيتورينگتىك توبى 70 تەن استام نىساندى تەكسەردى. ونىڭ ىشىندە 30 نىسانعا ەسكەرتۋ بەرىلدى. كەيبىرىندە تەپلوۆيزور بولماعان، كەيبىر قىزمەتكەرلەر ماسكا تاقپاعان. ەسەپ جۋرنالى جۇرگىزىلمەگەن نەمەسە تازالىق جۇمىسى جاسالماعان نىساندار بولدى. ءبىر قاۋىپسىزدىك تالاپتارىنا ساي كەلمەگەنى ءۇشىن جابىلدى»، - دەدى ەلوردالىق ينۆەستيتسيالار جانە كاسىپكەرلىكتى دامىتۋ باسقارماسىنىڭ ساۋدا جانە قىزمەت كورسەتۋ ءبولىمىنىڭ باس مامانى ازامات راشيتوۆ رەيد بارىسىندا.
سپيكەر قالانىڭ ءتورت اۋدانىندا ءتورت باقىلاۋ توبى جۇمىس ىستەيتىنىن جانە ەسكەرتۋ بەرىلگەن نىسانداردىڭ قايتا تەكسەرىلەتىنىن اتاپ ءوتتى.
«سانيتارلىق تالاپتاردىڭ بۇزىلۋىنىڭ الدىن الۋ ءۇشىن كۇن سايىن ونداعان رەيد وتكىزەمىز. بۇل جۇمىستار ءالى دە جالعاسادى. قالاداعى جاعداي ازىرگە تۇراقتى. ارنايى جوسپار بويىنشا ساۋدا نىساندارىنا بارامىز جانە ەسكەرۋ جاسالعان نىسانداردى قايتا تەكسەرەمىز، ikomek -تىڭ 109 نومىرىنە نەمەسە اكىمدىككە كەلىپ تۇسكەن شاعىمداردى قارايمىز. ماسەلەن، ەلوردانىڭ الماتى اۋدانىنداعى «ساۋلە» ساۋدا ۇيىنە بۇعان دەيىن ەسكەرتۋ جاسالعان ەدى. بۇگىن وندا كەلۋشىلەردىڭ بارلىعىنىڭ ماسكامەن جۇرگەنىن جانە تەپلوۆيزور مەن سانيتايزەرلەر ورناتىلعانىن كورىپ وتىرمىز. جەلدەتۋ جۇيەسى ىسكە قوسىلعان. ءبىزدىڭ مىندەتىمىز - سانيتارلىق تالاپتاردىڭ ورىندالۋىن قاداعالاۋ»، - دەدى ول.
سونىمەن بىرگە، الماتى اۋدانى قىزمەت ساپاسى مەن قاۋىپسىزدىگىن باقىلاۋ باسقارماسىنىڭ باس مامانى اسقار ساعىنايەۆ ساۋدا نىساندارىنا قانداي تالاپ قويىلاتىنىن ءتۇسىندىردى.
«كۇن سايىن قىزمەتكەرلەر مەن كەلۋشىلەردىڭ دەنە قىزۋى ولشەنۋى كەرەك. تاڭەرتەڭ جانە كەشكە قىزمەتكەرلەردىڭ دەنە تەمپەراتۋراسى ارنايى ەسەپ جۋرنالىنا جازىلىپ وتىرۋى ءتيىس. كىرەبەرىستە قولعا جاعاتىن سانيتايزەر تۇرۋى مىندەتتى. ارنايى جاۋاپتى ادام ءبارىن باقىلاپ، كەلۋشىلەرگە سانيتارلىق تالاپتاردى ءتۇسىندىرۋى كەرەك. كەلۋشىلەر دە، قىزمەتكەرلەر دە ماسكادا بولۋى قاجەت»، - دەدى ا. ساعىنايەۆ.
ءوز كەزەگىندە «ساۋلە» ساۋدا ءۇيىنىڭ وكىلى دە جاعدايدى ءتۇسىندىردى.
«بۇعان دەيىن كەلۋشىلەردىڭ دەنە قىزۋىن ولشەۋ بويىنشا ەسكەرتۋ جاسالدى. سوسىن ءبىر قىزمەتكەرىمىزدە ماسكا بولماعان. جالپى، باسقا ەرەجەلەردى ساقتاپ كەلەمىز. تازالىق جۇمىسى كۇنىنە ەكى رەت جۇرگىزىلەدى. قىزمەتكەرلەردىڭ دەنە قىزۋى ولشەنىپ، ارنايى جۋرنالعا جازىلادى. جۋۋ قۇرالدارى دا جەتكىلىكتى كولەمدە بار»، - دەدى «ساۋلە» ساۋدا ءۇيى اكىمشىسىنىڭ كومەكشىسى گاۋھار ەرماعامبەتوۆا. ايتا كەتەيىك، 20 -مامىردان باستاپ نۇر-سۇلتان مەن پەتروپاۆل قالالارىندا ساۋدا، ويىن-ساۋىق ورتالىقتارى مەن قوعامدىق مونشالار قايتا اشىلدى. ءبىراق، ويىن-ساۋىق الاڭدارى، فۋدكورتتار، كينوتەاترلار ازىرگە ىسكە قوسىلمايدى.
