قازاقستان مەن قىرعىزستان اراسىنداعى مەديتسينالىق ونىمدەردىڭ ەكسپورتى 7,7 ميلليون دوللاردى قۇرادى
قىرعىزستاندا وتكەن «دەنساۋلىق-2015» كورمەسىنە كەلۋشىلەر بۇعان كوز جەتكىزدى. ەلىمىزدە وندىرىلگەن مەديتسينالىق جابدىقتار مەن ءدارى- دارمەك ونىمدەرىنە دەگەن سۇرانىس ارتا تۇسكەن.
قازاقستاندىق برەندتەردى قىرعىزستاننىڭ مەديتسينالىق ونىمدەر مەن ءدارى- دارمەكتەر نارىعىنا دەندەپ ەنگىزۋ قاجەت. «كازنەكس ينۆەست» ەكسپورت جانە ينۆەستيتسيالار جونىندەگى ۇلتتىق اگەنتتىگى وسىنداي ماسەلە كوتەرىپ وتىر. مەكەمەنىڭ ساراپتامالىق قىزمەتى جەرگىلىكتى نارىقتاعى سۇرانىس كولەمى مەن باسەكەلەستىك دەڭگەيىنە تالداۋ جاسادى.
قازاقستان مەن قىرعىزستان اراسىنداعى ءدارى- دارمەك پەن مەديتسينالىق ونىمدەردىڭ ەكسپورتى 7,7 ميلليون ا ق ش دوللارىن قۇرادى. قىرعىزستان جىلىنا 148,9 ميلليون ا ق ش دوللارىنا ءدارى- دارمەك پەن مەديتسينا ونىمدەرىن يمپورتتايدى. سوندىقتان «كازنەكس ينۆەست» وسى كورمەدە فارماتسيەۆتيكالىق ءونىم شىعاراتىن 5 كومپانيانى تانىستىرىپ وتىر. بىشكەكتەگى بۇل كورمە - كەيبىر كومپانيالار ءۇشىن سىرتقى نارىقتى باعىندىرۋدىڭ العاشقى تالپىنىسى. دەگەنمەن قازاقستاندىق وندىرۋشىلەر قاتارىندا قىرعىزستان نارىعىندا ون جىلدان بەرى تۇراقتى جۇمىس ىستەپ جۇرگەندەرى دە بار.
فارماتسيەۆتيكالىق زاۋىت وكىلى:
- بىزدە ارنايى ينۆەستيتسيالىق جوبا بولدى. وندا ءبىزدىڭ كومپانيانىڭ تەرمينالدار مەن جاڭا وندىرىستىك تسەحتاردى دامىتۋعا ارنالعان 100 ميلليوننان استام دوللارى سالىندى. ورتالىق ازيا نارىعىندا ءبىزدىڭ ونىمدەردىڭ ەۋروپالىق برەندتارعا قاراعاندا ساپاسى تومەن دەپ ايتا المايمىز. ەۋرازيالىق ەكونوميكالىق وداق ەكسپورت باعىتىنا جاڭاشا سەرپىن بەرۋدە. قىرعىزستان وسى قاۋىمداستىققا قوسىلعاننان بەرى مەديتسينالىق جانە فارماتسيەۆتيكالىق ونىمدەر شىعاراتىن قازاقستاندىق كومپانيالار كورشى ەلدەن وكىلدىكتەرىن اشۋعا قۇلشىنىپ وتىر.
24.kz
