تاۋەلسىزدىك جىلدارىندا 7,5 ميلليون ءسابي دۇنيەگە كەلدى - ق ر پرەزيدەنتى
«اتالارىمىز اق نايزانىڭ ۇشىمەن، اق بىلەكتىڭ كۇشىمەن قورعاپ، ۇرپاققا ميراس ەتكەن ۇلانعايىر جەرىمىز، وتانىمىز، 18 ميلليون عانا حالقىمىز بار. جاڭا زاماندا ادام كاپيتالى، ءبىلىمدى، بىلىكتى ۇرپاق ەڭ باستى بايلىق دەپ ايتىپ كەلەمىز. حالىقتىڭ سانى كوپ، ساپاسى جوعارى بولۋى ءبىز ءۇشىن ايرىقشا ماڭىزدى. سوندىقتان ءبىز 20 ميلليون حالقى بار قازاقستانعا جەتەمىز دەگەن ماقسات قويدىق. سول سەبەپتى مەملەكەت دەموگرافيا ماسەلەسىنە ۇلكەن كوڭىل بولەدى»، - دەدى مەملەكەت باسشىسى.
وسى رەتتە قازاقستان پرەزيدەنتى ەلىمىزدە جىل سايىن دۇنيەگە كەلەتىن بالالاردىڭ سانى ارتا تۇسەتىندىگى قۋانتاتىندىعىن باسا ايتتى.
«2003 -جىلدان باستاپ ومىرگە ءبىر جىلدىڭ ىشىندە 250 مىڭ ءسابي كەلەتىن بولسا، بىلتىر 410 مىڭ وتباسى بەسىك تويىن تويلادى. تاۋەلسىز ەل بولعاننان بەرگى 25 جىلدىڭ ىشىندە 7,5 ميلليون ءسابي دۇنيەگە كەلدى. بۇل 7,5 ميلليون انانىڭ قايتالانباس ەرلىگى دەگەن ءسوز. بۇگىندە ءاربىر 10 قازاقستاندىقتىڭ تورتەۋى تاۋەلسىزدىكتىڭ پەرزەنتى»، - دەدى ەلباسى.
مەملەكەت باسشىسى مەملەكەت قامى ءۇشىن جاسالعان قىرۋار جۇمىستىڭ ءبارى ۇرپاقتىڭ بولاشاعى ءۇشىن ەكەنىن اتاپ ءوتتى.
«10 جىلدا جاڭا تۋعان بالاعا بەرىلەتىن ءبىر رەتتىك جاردەماقى 5 ەسەگە كوبەيدى. مەنىڭ تاپسىرمام بويىنشا 1 -شىلدەدەن باستاپ 20 پايىزعا وسەتىن بولادى. تاۋەلسىزدىك جىلدارى 1300-دەن استام مەكتەپ، 1300-دەن استام دەنساۋلىق ساقتاۋ نىساندارىن سالدىق. بيىلعى جولداۋىمدا الەۋمەتتىك سالا ەڭ باستى باسىمدىق بولىپ قالا بەرەتىندىگىن ايتتىم»، - دەدى نۇرسۇلتان نازاربايەۆ.
اۆتور: مارلان جيەمباي
