بۇرىن بالاعات ءسوز ايتقانى ءۇشىن جازالانعان اقتاۋلىق شەنەۋنىك 7,5 جىلعا سوتتالدى

استانا. قازاقپارات - اقتاۋ اكىمدىگىنىڭ تۇرعىن ءۇي كوممۋنالدىق شارۋاشىلىعى ءبولىمىنىڭ بۇرىنعى باسشىسى، قالا اكىمى ورىنباسارى قىزمەتىن اتقارعان ساعىنعالي امانگەلديەۆكە قاتىستى سوت ۇكىمى شىقتى.

بۇل تۋرالى «لادا» باسىلىمى اقتاۋ پروكۋرورى تالعات الىبايەۆقا سىلتەمە جاساپ حابارلادى.

ساعىنعالي امانگەلديەۆ ق ر ق ك 361-بابى 2-بولىگى («قىزمەتتىك لاۋازىمىن اسىرا پايدالانۋ») جانە 366-بابى 3-بولگى 2-تارماعى («پارا الۋ») بويىنشا كىنالى دەپ تانىلدى. بۇرىنعى شەنەۋنىك 7,5 جىلعا باس بوستاندىعىنان ايىرىلدى. اقتاۋ پروكۋرورىنىڭ ايتۋىنشا، ول جازاسىن قاتاڭ رەجيمدەگى كولونيادا وتەيدى.

وسى قىلمىستىق ءىس بويىنشا بۇعان دەيىن اقتاۋ تۇرعىن ءۇي كوممۋنالدىق شارۋاشىلىعى ءبولىمىنىڭ باس ەسەپشىسى جانە كوگالداندىرۋمەن اينالىساتىن ەكى ەنشىلەس كومپانيانىڭ باسشىلارى ۇستالعان بولاتىن.

2013 -جىلى ساعىنعالي امانگەلديەۆ قاراماعىنداعى قىزمەتكەردى بالاعاتتاعانى ءۇشىن جازالانعان ەدى. پروكۋراتۋرا امانگەلديەۆتى مەملەكەتتىك قىزمەتكەردىڭ ار نامىس كودەكسىن بۇزعانى ءۇشىن ايىپتادى.