قازاقستاندىق قۇتقارۋشىلار تۇركيادا 7 ادامدى قۇتقارىپ، 53 ادامنىڭ ءمايىتىن شىعاردى
قايتىس بولعان 53 ادامنىڭ، ونىڭ ىشىندە 4 بالانىڭ دەنەسى ءۇيىندى استىنان شىعارىلدى، دەپ حابارلادى بۇگىن ق ر توتەنشە جاعدايلار مينيسترلىگىنىڭ باسپا ءسوز قىزمەتى.
قازىرگى ۋاقىتتا قازاقستان ت ج م قۇتقارۋشىلارى ىزدەۋ-قۇتقارۋ جۇمىستارىن جالعاستىرۋدا.
گازيانتەپ قالاسى ءبىرىنشى ەشەلونمەن بارعان قۇتقارۋشىلار تاۋلىك بويى ەكى اۋىسىمدا ءۇش ۋچاسكەدە جۇمىس ىستەپ جاتىر.
قۇتقارۋشىلاردىڭ ءبىرىنشى توبى توعىز قاباتتى عيماراتتا جۇمىس جۇرگىزىپ جاتىر. عيمارات تولىعىمەن قيراعان. ۇيىندىلەردىڭ اراسىنان ادامداردى ىزدەۋ جۇمىستارى جالعاسۋدا. بۇل جەردە ۇيىندىلەردىڭ استىنان 4 ادام قۇتقارىلدى، 8 قازا تاپقان ادامنىڭ دەنەسى شىعارىلدى.
قۇتقارۋشىلاردىڭ ەكىنشى توبى التى قاباتتى عيماراتتا جۇمىس جۇرگىزۋدە. عيمارات ءىشىنارا قيراعان، اپاتتى، قيراۋ ديناميكاسى بايقالادى، تۇراقسىز قۇرىلىمدارعا بايلانىستى عيماراتتاردىڭ تولىق قيراۋ قاۋپى بار. عيماراتتىڭ 2-قاباتىنا دەيىن ينجەنەرلىك تەحنيكانى پايدالانا وتىرىپ، دەمونتاج جۇرگىزىلدى، ۇيىندىلەردىڭ اراسىنان ادامداردى ىزدەۋ جۇمىستارى جالعاسۋدا. قايتىس بولعان 19 ادامنىڭ دەنەسى شىعارىلدى.
ءۇشىنشى توپ تا التى قاباتتى عيماراتتا جۇمىس جۇرگىزۋدە. عيمارات تولىعىمەن قيراعان. ۇيىندىلەردىڭ اراسىنان ادامداردى ىزدەپ جاتىر، قايتىس بولعان 18 ادامنىڭ دەنەسى شىعارىلدى.
قازاقستانن ت ج م ەكىنشى ەشەلونمەن بارعان قۇتقارۋشىلار تۇركياعا كەلگەن ساتتەن باستاپ نۋرداگى قالاسىندا ىزدەۋ-قۇتقارۋ جۇمىستارىن تاۋلىك بويى جۇرگىزۋدە. تولىعىمەن قيراعان عيماراتتا قازاقستاندىق قۇتقارۋشىلار ادامداردىڭ ورنالاسقان جەرى مەن جاي-كۇيىن انىقتاۋ، ۇيىندىلەر استىندا زارداپ شەككەندەرمەن اۋديو بايلانىس ورناتۋ، قاجەتتى كومەكتىڭ كولەمى مەن سيپاتىن انىقتاۋ بويىنشا جۇمىستارىن جۇرگىزدى.
قازاقستاندىق قۇتقارۋشىلاردىڭ وتە تەرەڭدە جاتقان ۇيىندىلەردىڭ استىنان زارداپ شەككەندەردى ەۆاكۋاتسيالاۋ ءۇشىن جول اشۋ جۇمىستارىن ورىنداپ، جەدەل جانە ساۋاتتى ءىس-قيمىلدىڭ، سونداي-اق زارداپ شەككەندەردى بلوكتان شىعارۋ بويىنشا ۋاقتىلى قابىلدانعان شارالاردىڭ ناتيجەسىندە كولەمى 18 مىڭ تەكشە مەتردەن استام ءۇيىندىنىڭ استىنان ءۇش ءتىرى ادامدى - ەر ادام مەن ەكى ايەلدى شىعارۋعا مۇمكىندىك تۋدى. ادامدار دەرەۋ مەديتسينا ماماندارىنا جەتكىزىلدى. قايتىس بولعان 4 ادامنىڭ دەنەسى شىعارىلدى. زارداپ شەككەن ادامداردى ىزدەۋگە تەحنيكالىق قۇرالدار، ۇيىندىلەردى بولشەكتەۋگە ينجەنەرلىك تەحنيكا پايدالانىلۋدا. ۇيىندىلەردىڭ اراسىنان ادامداردى ىزدەۋ جۇمىستارى جۇرگىزىلۋدە.
