تەكەلى قالاسىندا جالپى قۇنى 7,3 ميلليارد تەڭگەنى قۇرايتىن 7 جوبا جۇزەگە اسىرىلۋدا - الماتى وبلىسى

استانا. قازاقپارات - مونوقالالاردى دامىتۋ باعدارلاماسى اياسىندا رەسپۋبليكامىزدىڭ شاعىن قالالارى تىزىمىنە الماتى وبلىسىنان ورتا دامۋ سەرپىنىمەن 31,8 مىڭ ادام سانى بار تەكەلى قالاسى ەنگىزىلگەن بولاتىن.

باعدارلامانى جۇزەگە اسىرۋ ماقساتىندا «تەكەلى قالاسىنىڭ 2013-2015 -جىلدارعا ارنالعان كەشەندى دامۋ جوسپارى» الماتى وبلىستىق ءماسليحاتىنىڭ شەشىمىمەن 2012 -جىلدىڭ قازان ايىندا بەكىتىلدى، دەپ حابارلايدى الماتى وبلىسى اكىمدىگىنىڭ باسپا ءسوز قىزمەتىنەن.

باعدارلاما اياسىندا 2015 -جىلى رەسپۋبليكالىق بيۋدجەتتەن 683,0 ميلليون تەڭگە، جەرگىلىكتى بيۋدجەتتەن - 376,0 ميلليون تەڭگە ءبولىندى.

ونەركاسىپ ءوندىرىسى مەن ينۆەستيتسيا كولەمىن ارتتىرۋ ماقساتىندا قالادا جالپى سمەتالىق قۇنى 7,3 ميلليارد تەڭگەنى قۇرايتىن 7 جوبا جۇزەگە اسىرىلۋدا. ولاردىڭ قاتارىندا قورا وزەنىندە 25 مەگاۆات جىلۋ ەلەكتر ستانساسىنىڭ قۇرىلىسى (جوبانىڭ قۇنى - 4,7 ميلليارد تەڭگە)؛ ەلەكتر جابدىقتارى مەن تەمىر بەتوندى بۇيىمدار ءوندىرىسى بويىنشا شاعىن زاۋىت قۇرىلىسى (جوبانىڭ قۇنى - 480,0 ميلليون تەڭگە)؛ وتتەكتى- ازوت ءوندىرىسى ءۇشىن سەح قۇرىلىسى (جوبانىڭ قۇنى - 90,0 ميلليون تەڭگە)؛ كولىك لوگيستيكاسىن قۇرۋ (جوبانىڭ قۇنى - 675,0 ميلليون تەڭگە)؛ «تەكەسۋ» تۋريستىك بازاسىنىڭ قۇرىلىسى (جوبانىڭ قۇنى - 372,0 ميلليون تەڭگە)؛ دەنەشىنىقتىرۋ- ساۋىقتىرۋ كەشەنىنىڭ قۇرىلىسى (جوبانىڭ قۇنى - 675,0 ميلليون تەڭگە) بار.