ءپىرماتوۆ «7-20-25» تۋرالى: باعدارلاما ۇنەمى جالعاساتىنىن ەشكىم ايتقان جوق
«ۇلتتىق بانك توقسان سايىن 25 ميلليارد، جىلىنا 100 ميلليارد تەڭگە دەلىنگەن اقپاراتتى قاداعالايتىن بولادى. قازىرگى ۋاقىتتا بۇل پارامەترلەردى وزگەرتۋگە قاتىستى ەشقانداي جوسپار جوق»، - دەدى ول ۇلتتىق بانكتە وتكەن بريفينگ بارىسىندا ب ا ق وكىلدەرىنىڭ «7-20-25» باعدارلاماسىنا قاتىستى قويىلعان ساۋالىنا وراي.
سونىمەن قاتار ول ارزان ءارى نارىققا ساي كەلمەيتىن نەسيە ۇسىنۋ ۇلتتىق بانكتىڭ مىندەتى ەمەستىگىن باسا ايتتى.
«ءىس-شارا داعدارىسقا قارسى جاسالدى. ۇلتتىق بانك بۇل باعدارلاماعا قاتىستى. ولاردىڭ بارلىعى داعدارىسقا قارسى ءارى ۋاقىتىلى ەدى. بۇل ءىس-شارالاردان ءبىز قالاي تەزىرەك شىقساق، بارلىق قازاقستاندىقتار ءۇشىن ۇزاق مەرزىمدى تيىمدىرەك بولادى»، - دەدى ۇ ب ءتوراعاسى.
عالىمجان ءپىرماتوۆ باعدارلامانىڭ ۋاقىتشا بولعاندىعىن ايتادى.
«ەستەرىڭىزدە بولسا، 2018-جىلى ول جاريا ەتىلگەن كەزدە 1 تريلليون تەڭگە بولىنەتىندىگى ايتىلدى جانە بۇل قاراجات وسى جىلدىڭ ءبىرىنشى جارتىجىلدىعىندا تاۋسىلۋى ءتيىس. دەمەك، ءىس جۇزىندە ءبىز بارلىق مىندەتتەمەنى ورىندايمىز. ۋادە بەرىپ، ارتىنان قىسقارتىپ تاستاۋ دەگەن جوق. بۇل باعدارلامانى ۇنەمى بولاتىندىعىن ءارى قارجىعا قاتىستى ەشقانداي شەكتەۋ جوقتىعىن ەشكىم ايتقان جوق»، - دەدى عالىمجان ءپىرماتوۆ.
