باسپانا حيت جانە «7-20-25» باعدارلاماسى بويىنشا جۇمىس ىستەيتىن الاياقتار پايدا بولدى

الماتى. قازاقپارات - قازاقستاننىڭ ورنىقتىلىق قورى اتىنان جالعان كەپىلدىك حاتتارىن قولدانعان الاياقتىق جاعدايلار انىقتالدى، دەپ حابارلايدى قازاقپارات ءتىلشىسى.

«قازاقستاننىڭ ورنىقتىلىق قورى» اكسيونەرلىك قوعامى باسشىلىقتىڭ قولى قويىلعان جانە قوردىڭ مورىمەن راستالعان جالعان قۇجاتتاردى ءۇشىنشى تۇلعالاردىڭ تاراتۋ جاعدايلارى انىقتالعانى تۋرالى ەسكەرتەدى. اتاپ ايتقاندا، الاياقتار ازاماتتارعا قور اتىنان مەنشىككە بەرۋ كەپىلدىگى تۋرالى جانە جىلجىمايتىن مۇلىككە مەنشىك قۇقىعىن تىركەۋ تۋرالى جالعان كەپىلدىك حاتتار بەرۋمەن اينالىسقان.

وسىعان بايلانىستى، قور قانداي دا ءبىر كەپىلدىك حاتتاردى بەرۋدى جۇزەگە اسىرمايتىندارىن ءمالىم ەتتى. «قور «7-20-25» جانە «باسپانا حيت» يپوتەكالىق تۇرعىن ءۇي باعدارلامالارىنىڭ وپەراتورى بولىپ تابىلادى جانە وسى باعدارلامالار اياسىندا تەك بانكتەرمەن ءوزارا قارىم- قاتىناس جاسايدى. قور جەكە تۇلعالارمەن جۇمىس ىستەمەيدى، قۇرىلىس سالاسىنا ارالاسپايدى جانە ءوز بالانسىندا جىلجىمايتىن مۇلىك ۇستامايدى»، - دەپ اتاپ ءوتتى «قازاقستاننىڭ ورنىقتىلىق قورى» ا ق.

قورداعىلار ازاماتتاردى قىراعى بولۋعا شاقىردى. «ەگەر بەلگىسىز جاندار سىزگە قور اتىنان قانداي دا ءبىر حاتتار، انىقتامالار بەرگەنىنە كۋا بولساڭىز، دەرەۋ قۇقىق قورعاۋ ورگاندارىنا حابارلاسۋىڭىزدى سۇرايمىز»، - دەلىنگەن حابارلامادا.

سۇراقتار مەن كۇدىك تۋىنداعان جاعدايدا 2272025 (7727) ءنومىرى بويىنشا قوردىڭ call-ورتالىعىنا حابارلاسۋىڭىزدى سۇرايمىز (وپەراتورمەن قوسىلۋ ءۇشىن 0- ءدى تەرىڭىز).

اۆتور: الما مۇقانوۆا