مەملەكەتتىڭ «7-20-25» يپوتەكالىق باعدارلاماسى قاشان اياقتالادى

الماتى. قازاقپارات - مەملەكەت نەسيەلەۋ باعدارلامالارىن قارجىلاندىرۋدى كەزەڭ- كەزەڭىمەن اياقتاۋدى جوسپارلاپ وتىر.

بۇل تۋرالى ق ر قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆا ءمالىم ەتتى، دەپ حابارلايدى قازاقپارات ءتىلشىسى.

«الەمدىك داعدارىس جانە ونىڭ ەكونوميكاعا تيگىزەتىن اسەرىن ەسكەرىپ، نارىق پرينتسيپتەرىنە جول بەرە وتىرىپ، مەملەكەتتىڭ نەسيەلەۋ باعدارلامالارىنان بىرتىندەپ شىعۋىن قامتاماسىز ەتۋ ماڭىزدى. وسىعان بايلانىستى، ۇكىمەت، ۇلتتىق بانك جانە اگەنتتىك اراسىندا جىلدىڭ باسىندا 2021-2023 -جىلدارعا ارنالعان ماكروەكونوميكالىق ساياسات شارالارىن ۇيلەستىرۋ تۋرالى كەلىسىمگە قول قويىلعان بولاتىن. كەلىسىم اياسىندا 2023 -جىلدان باستاپ ۇلتتىق بانك مەملەكەتتىك باعدارلامالاردى قارجىلاندىرمايدى»، - دەدى ءمادينا ءابىلقاسىموۆا.

ونىڭ ايتۋىنشا، 2021 -جىلى «باسپانا حيت»، 2022 -جىلى «7-20-25» باعدارلامالارىن قارجىلاندىرۋ اياقتالادى.

«ۇكىمەت ءوز كەزەگىندە تىكەلەي قارجىلاندىرۋدان كاسىپكەرلىك سۋبەكتىلەرىنىڭ نەسيەلىك تاۋەكەلدەرىنە كەپىلدىك بەرۋگە كوشۋ مۇمكىندىگىن قاراستىرادى»، - دەپ اتاپ ءوتتى ءمادينا ءابىلقاسىموۆا.

اۆتور: الما مۇقانوۆا