جاڭا «7-20-25» باعدارلاماسى: العاشقى جارنا سالىمى ارزاندايدى

استانا. قازاقپارات - «باسپانا» يپوتەكالىق ۇيىمى جاس وتباسىلار مەن بيۋجەتتىك سالا قىزمەتكەرلەرىنە قارجىلىق جۇكتەمەنى ازايتۋ ماقساتىندا العاشقى جارنا كولەمىن ەكى ەسەگە دەيىن ازايتپاق. بۇل تۋرالى قازاقپارات ۇيىمنىڭ باسپا ءسوز قىزمەتىنە سىلتەمە جاساپ حابارلايدى.

«جاس ارمان» جانە «قامقور باسپانا» ونىمدەرى «باسپانا» جانە جەرگىلىكتى اتقارۋشى ورگاندار اراسىنداعى ىنتىماقتاستىققا نەگىزدەلىپ، اتالمىش ساناتتاعى ازاماتتارعا «7-20-25» يپوتەكاسىنىڭ العاشقى جارناسىن ەكى ەسەگە ازايتۋدى قاراستىرادى. جەرگىلىكتى اتقارۋشى ورگاندار وبليگاتسيالار شىعارادى جانە حالىقتىڭ اتالعان ساناتى ءۇشىن باستاپقى جارنانىڭ جارتىسىن سۋبسيديالاۋعا مىندەتتەنەدى. ءوز كەزەگىندە باسپانا اكىمدىكتەر وبليگاتسيالارىن ساتىپ الىپ، «7-20-25» باعدارلاماسىنا قاتىساتىن بانكتەرمەن حالىقتىڭ وسى كاتەگورياسىن نەسيەلەندىرۋدى قامتاماسىز ەتەدى.

«ءبىز «7-20-25» باعدارلاماسىنا جاس وتباسىلار مەن بيۋدجەتتىك سالا قىزمەتكەرلەرىنىڭ قاتىسۋىنا وراسان زور ءمان بەرەمىز. ولار تاراپىنان العاشقى جارنانى جيناۋدىڭ قيىندىعى جونىندە كوپتەگەن پىكىرلەر كەلىپ ءتۇستى. سول سەبەپتى، قولداۋ مۇمكىندىكتەرىن بارىنشا قاراستىردىق. مۇنداي الەۋمەتتىك شەشىمدەردى ىسكە اسىرۋ ءۇشىن اكىمدىكتەر تاراپىنان قولداۋ كۇتەمىز»، - دەدى «باسپانا» يپوتەكالىق ۇيىمىنىڭ باسقارما ءتوراعاسى قايرات التىنبەكوۆ.

«جاس ارمان» جانە «قامقور باسپانا» ونىمدەرى ءبىرىنشى بولىپ شىمكەنت قالاسىندا پيلوتتىق رەجيمدە جۇمىس ىستەي باستادى.

ەستەرىڭىزدە بولسا، تامىز ايىنىڭ باسىندا ءبىرقاتار بۇقارالىق اقپارات قۇرالدارى مەملەكەتتىك قىزمەتكەرلەردىڭ «7-20-25» باعدارلاماسىنا قاتىسۋ ءۇشىن العاشقى جارنانى جيناۋ قيىندىقتارىنا تاپ بولىپ، شاعىمدانعانى جونىندە جازعان بولاتىن.