جاڭا 7-20-25 باعدارلاماسىنىڭ تۇرعىن ءۇي قۇرىلىس جيناق بانكىندەگى شارتى قانداي بولادى؟

الماتى. قازاقپارات - «تۇرعىن ءۇي قۇرىلىس جيناق بانكى» ا ق مەملەكەت باسشىسىنىڭ 7-20-25 باعدارلاماسىنا قاتىساتىن بولدى.

بۇگىن بايلانىس جانە اقپارات كۇنى مەيرامىنا وراي وتكەن پرەسس-لانچ بارىسىندا بانك ءتورايىمى ءلاززات يبراگيموۆا بانكتىڭ اتالعان باعدارلاماعا قاتىسۋ شارتتارىن ايتتى، دەپ حابارلايدى قازاقپارات ءتىلشىسى.

بانكتىڭ باسقارما ءتورايىمى ءلاززات يبراگيموۆانىڭ ايتۋىنشا، 7-20-25 باعدارلاماسىنا قاتىسۋ ءۇشىن ەڭ الدىمەن زاڭ نورماسى بولۋى كەرەك.

«اتالعان باعدارلاماعا قاتىسۋ ءۇشىن ەڭ الدىمەن مەملەكەت باسشىسى قول قويعان زاڭ بولۋى ءتيىس. زاڭ بولماسا، بانك باعدارلامامەن جۇمىس باستاي المايدى. قازىر بۇل قۇجات ءماجىلىس پەن سەناتتان ءوتتى. بىلۋىمشە، مەملەكەت باسشىسىنىڭ قاراۋىندا جاتىر. زاڭعا شامامەن تامىزدا، قىركۇيەكتە قول قويىلادى. زاڭ دايىن بولعان سوڭ بانك ۇلتتىق بانكتەن ارنايى ليتسەنزيا سۇراتادى. ليتسەنزيا 1 اي كولەمىندە بەرىلەدى»، - دەدى بانكتىڭ باسقارما ءتورايىمى ءلاززات يبراگيموۆا.

باسقارما ءتورايىمى اتالعان باعدارلامانىڭ ەكونوميكاعا مۋلتيپليكاتيۆتى اسەرى جايلى ايتىپ ءوتتى.

«بۇل اينالىپ تۇرعان دوڭگەلەك دەسەك بولادى. ماسەلەن، ءبىز 4 ادامعا 100 ميلليون تەڭگە كولەمىندە نەسيە بەرەمىز دەيىك. ءار كليەنتكە 20 ميلليون تەڭگە بەرىلەدى. باسپانانىڭ ماكسيمالدى قۇنى 25 ميلليون تەڭگە. كليەنتتەردىڭ مەنشىگىندە 5 جىل بويى باسپانا بولماۋى كەرەك. سوسىن تەك قۇرىلىس كومپانياسى سالعان، ياعني جاڭا پاتەرلەر بولۋى ءتيىس. ماسەلەن، سىزدەر 25 ميلليون تەڭگەدەن نەسيە الدىڭىزدار. 5 ميلليون تەڭگەدەن 20 ميلليون تەڭگەنى العاشقى سالىم رەتىندە بەردىڭىزدەر. سوندا بانك قانشا اقشا جۇمسايدى؟ 80 ميلليون تەڭگە. سىزدەردىڭ 4 نەسيەڭىزدى «باسپانا» يپوتەكالىق كومپانياسى ساتىپ الادى. ول قارجىنى بانك نەسيە رەتىندە تاعى كەلەسى 4 كليەنتكە بەرەدى. وسىلايشا مۋلتيپليكاتيۆتى دوڭگەلەك جۇمىس جاساي باستايدى. ال، 7 پايىزدىڭ 4 پروتسەنتى بىزدە قالسا، 3 پروتسەنتى «باسپاناعا» بەرىلەدى»، - دەدى ءلاززات يبراگيموۆا.

باسقارما ءتورايىمى «7-20-25» باعدارلاماسى بويىنشا نەسيە العاندارعا تالاپ قاتاڭ بولاتىنىن جەتكىزدى.

ونىڭ ايتۋىنشا، نەسيە 90 كۇننەن ارتىق تولەنبەگەن جاعدايدا ەكىنشى دەڭگەيلى بانككە قايتارىلادى.

سونىمەن قاتار، ت ق ج ب 7-20-25 باعدارلاماسىندا جىلدىق 7 پايىزدىق مولشەرلەمە 25 جىل بويى وزگەرمەيتىنى بەلگىلى بولدى.

ايتا كەتۋ كەرەك، ق ر ۇلتتىق بانكى «7-20-25. ءاربىر وتباسىنا باسپانا الۋدىڭ جاڭا مۇمكىندىكتەرىن بەرۋ» يپوتەكالىق تۇرعىن ءۇي كرەديتتەۋ باعدارلاماسىن بەكىتكەن بولاتىن.