دانيار اقىشەۆ «7-20-25» باعدارلاماسى بويىنشا باسپانا الۋ ءۇشىن نە ىستەۋ كەرەك ەكەنىن ايتتى

استانا. قازاقپارات - «7-20-25» تۇرعىن ءۇي باعدارلاماسى بيىلعى جىلدىڭ ەكىنشى جارتىسىندا ىسكە قوسىلادى.

ۇلتتىق بانك ءتوراعاسى دانيار اقىشەۆ جاڭا «7-20-25» يپوتەكالىق باعدارلاماسى بويىنشا باسپانا الۋ ءۇشىن نە ىستەۋ قاجەتتىگىن ايتتى، دەپ حابارلايدى Sputnik قازاقستان ءتىلشىسى.

«ۇلتتىق بانك قازىر مەملەكەت باسشىسىنىڭ بەس الەۋمەتتىك باستاماسىنىڭ اياسىندا «7-20-25» باعدارلاماسىن ازىرلەپ جاتىر. مەن ازاماتتاردىڭ وسى باعدارلاماعا قاتىسۋ ءۇشىن نە ىستەۋ قاجەت ەكەنىن ايتقىم كەلەدى»، - دەدى بۇگىن پارلامەنتتىك تىڭداۋ بارىسىندا دانيار اقىشەۆ.

بىرىنشىدەن، ازامات ساتىپ الاتىن باسپاناسىن تاڭداۋ كەرەك. بۇل ورايدا باعدارلامادا ءۇيدىڭ شەكتى قۇنى بەكىتىلەتىنىن ەسكەرگەن ءجون. مىسالى، استانا، الماتى، اقتاۋ، اتىراۋ قالالارىندا باسپانانىڭ ەڭ جوعارى باعاسى 25 ميلليون تەڭگە، ال باسقا وڭىرلەردە 15 ميلليون تەڭگە بولادى.

بۇدان بولەك، اقىشەۆتىڭ ايتۋىنشا، باستاپقى كەزەڭدە باعدارلاما اياسىندا جاڭا ۇيلەرگە عانا يپوتەكا بەرىلەدى.

«ەكىنشىدەن، ازامات باعدارلاماعا قاتىساتىن بانككە كەلىپ، ءوتىنىش پەن قاجەتتى قۇجاتتاردى تاپسىرۋ قاجەت. ءبىز تاياۋدا قارجىلىق كورسەتكىشتەرى جوعارى، فيليالدىق جۇيەسى مەن ازاماتتارعا قىزمەت كورسەتۋ ساپاسى جاقسى دامىعان بانكتەردى بەكىتەمىز»، - دەدى ول.

«ۇشىنشىدەن، كرەديت الۋ ءۇشىن ازاماتتىڭ تابىسى بولۋى كەرەك. تورتىنشىدەن، ونىڭ مەنشىگىندە باسپاناسى بولماۋعا ءتيىس، بۇل تالاپتى ءبىز قازىر ەگجەي-تەگجەي قاراستىرىپ جاتىرمىز. ۇلتتىق بانك وسى ەرەجەلەردى حالىققا ءتۇسىندىرىپ، بەلسەندى جۇمىس ىستەۋگە بار كۇشىن سالادى»، - دەدى اقىشەۆ.

ەسكە سالا كەتسەك، پرەزيدەنت نۇرسۇلتان نازاربايەۆ «7-20-25» جاڭا تۇرعىن ءۇي باعدارلاماسىن ۇسىنعان ەدى. جۇمىس ىستەيتىن ءاربىر قازاقستاندىق تومەندەگىدەي شارتتار بويىنشا تەڭگەمەن نەسيە الۋ مۇمكىندىگىنە يە بولادى. نەسيە ءوسىمىنىڭ مولشەرلەمەسى قازىرگىدەي 14-16 ەمەس، جىلىنا 7 پايىزدان اسپايدى. باستاپقى جارنا باسپانا قۇنىنىڭ 20 پايىزى مولشەرىندە بەلگىلەنەدى. نەسيە الۋشىنىڭ اي سايىنعى تولەمىن ازايتۋ ءۇشىن ونىڭ مەرزىمى 10-15 ەمەس، 25 جىلعا دەيىن بولادى.

بانكتەردەن كرەديتتەردى ساتىپ الاتىن وپەراتور قۇرىلىپ، ول «باسپانا» يپوتەكالىق كومپانياسى دەپ اتالماق. باعدارلاما 2018 -جىلدىڭ ەكىنشى جارتىسىنان باستاپ ىسكە قوسىلادى دەپ جوسپارلانىپ وتىر.