بانكتەر «7-20-25» باعدارلاماسىنا قاتىسۋعا دايىن - دانيار اقىشيەۆ

استانا. قازاقپارات - بانكتەر «7-20-25» باعدارلاماسىنا قاتىسۋعا دايىن ەكەنىن مالىمدەدى. بۇل تۋرالى ءماجىلىستىڭ جالپى وتىرىسىنان كەيىن تىلشىلەرگە ق ر ۇلتتىق بانك ءتوراعاسى دانيار اقىشيەۆ ايتتى، دەپ حابارلايدى قازاقپارات.

 «بۇدان بۇرىن جاريالانعانداي، «7-20-25» باعدارلاماسىن 2018 - جىلدىڭ ەكىنشى جارتىجىلدىعىنان باستاپ جۇزەگە اسىرۋعا نيەتتىمىز. الايدا ونىڭ ءساتتى ءوتۋى ءۇشىن بىزگە الدىمەن زاڭنامانى وزگەرتۋ كەرەك بولىپ وتىر، ياعني ەرەجەلەردىڭ ءتيىستى دەڭگەيدە جۇمىس ىستەۋىنە نازار اۋدارىلادى. ەكىنشىدەن، بۇل باعدارلامانى تەك نارىقتىق ۇستانىمدار اياسىندا ىسكە قوسامىز جانە بىزبەن تالقىلاۋدا بولعان بانكتەر باعدارلامانىڭ نەگىزگى وپەراتورلارى رەتىندە كىرىسەدى. وسى ورايدا ولاردىڭ بارلىعى وزدەرىنىڭ دايىن ەكەندىكتەرىن مالىمدەدى. جالپى، بانكتەردى اتالعان باعدارلامانىڭ تالاپتارىمەن كەلىسىپ وتىر»، - دەدى اقىشيەۆ.

وسى ورايدا ول بۇگىندە بانكتەرمەن وسى باعدارلامانى جۇزەگە اسىرۋدىڭ ءمان- جايى پىسىقتالىپ جاتقانىن اتاپ ءوتتى.

«سوندىقتان 2018 -جىلدىڭ ەكىنشى جارتىجىلدىعىنان بانكتەر ۇسىنىستار جاساۋعا دايىن بولۋى ءۇشىن ولارمەن ءتيىستى قادامداردى پىسىقتاپ جاتىرمىز»، - دەدى ۇ ب باسشىسى.

ەستەرىڭىزگە سالا كەتەيىك، قازاقستان پرەزيدەنتى نۇرسۇلتان نازاربايەۆ «پرەزيدەنتتىڭ بەس الەۋمەتتىك باستاماسى» اتتى حالىققا ۇندەۋىن جاريا ەتتى.

وسى باستامالاردىڭ ءبىرى «ءاربىر وتباسىنا باسپانا الۋدىڭ جاڭا مۇمكىندىكتەرىن بەرۋ» باعىتىنا ارنالىپ وتىر.

 «سوندىقتان، مەن «7 - 20 - 25» باعدارلاماسىن ۇسىنامىن. جۇمىس ىستەيتىن ءاربىر قازاقستاندىق تومەندەگىدەي شارتتار بويىنشا تەڭگەمەن نەسيە الۋ مۇمكىندىگىنە يە بولادى. نەسيە ءوسىمىنىڭ مولشەرلەمەسى قازىرگىدەي 14-16 ەمەس، جىلىنا 7 پروتسەنتتەن اسپايتىن بولادى. قازىر بانكتەر باستاپقى جارناعا باسپانا قۇنىنىڭ 30 پروتسەنتىنە دەيىن، كەيدە ءتىپتى 50 پروتسەنتىن سالۋدى تالاپ ەتسە، بۇل باعدارلاما بويىنشا ول 20 پروتسەنتتەن اسپاۋعا ءتيىس. نەسيە الۋشىنىڭ اي سايىنعى تولەمىن ازايتۋ ءۇشىن ونىڭ مەرزىمى 10-15 ەمەس، 25 جىلعا دەيىن بولادى. ول ءۇشىن ۇلتتىق بانكتىڭ، ەكىنشى دەڭگەيلى بانكتەر مەن قور نارىعىنىڭ مۇمكىندىكتەرىن ىسكە قوسۋ كەرەك»، - دەپ اتاپ ءوتتى مەملەكەت باسشىسى.