جاڭا «7-20-25» باعارلاماسى: 200 گە جۋىق قازاقستاندىق باسپانالى بولدى
«2018-جىلدىڭ 3- تامىزىنداعى جاعدايعا سايكەس، «7-20-25» باعدارلاماسىنىڭ سەرىكتەس بانكتەرىنە جالپى سوماسى 11991465581 تەڭگەنىڭ 1039 ءوتىنىمى ءتۇستى. ونىڭ ىشىندە 640 وتىنىمگە 7311155602 تەڭگە ماقۇلداندى. بۇل باعدارلاما بويىنشا 3- تامىزدا 193 قازاقستاندىق باسپانالى بولدى. قازىرگى ۋاقىتتا بەرىلگەن كرەديتتىڭ جالپى سوماسى 2206363499 تەڭگەنى قۇرايدى»، - دەلىنگەن جاۋاپتا.
كەلتىرىلگەن دەرەكتەرگە قاراعاندا، الماتىنىڭ 82، استانانىڭ 27، اقتاۋدىڭ 25، قوستاناي وبلىسىنىڭ 16 جانە شىعىس قازاقستان وبلىسىنىڭ 11 تۇرعىنى باسپانالى بولعان. ءبىر ادامعا بەرىلگەن كرەديتتىڭ ورتاشا سوماسى 11,4 ميلليون تەڭگەنى قۇرايدى.
«باسپانا» ۇيىمى «7-20-25» باعدارلاماسى قاي ۋاقىتتا كەڭەيتىلىپ، وعان ەكىنشى نارىقتان دا پاتەر ساتىپ الۋ مۇمكىنشىلىگى قاشان قوسىلاتىندىعى تۋرالى سۇراققا دا جاۋاپ بەردى.
«باعدارلامانىڭ بەكىتىلگەن تالاپتارىنا سايكەس، دايىن تۇرعىن ءۇيدى عانا ساتىپ الۋعا بولادى. ەكىنشى نارىقتاعى تۇرعىن ۇيلەرىن دە ساتىپ الۋ مۇمكىنشىلىگى قوسىلىپ، باعدارلاما كەڭەيتىلگەن جاعدايدا قازاقستان رەسپۋبليكاسىنىڭ ۇلتتىق بانكى مەن «باسپانا» يپوتەكالىق ۇيىمى بۇل جايىندا بۇقارالىق اقپارات قۇرالدارى ارقىلى رەسمي حابارلايتىن بولادى»، - دەپ اتاپ وتەدى يپوتەكالىق ۇيىم.
ەستەرىڭىزگە سالا كەتەيىك، «7-20-25» باعدارلاماسى اعىمداعى جىلدىڭ 5- ناۋرىزىندا مەملەكەت باسشىسى نۇرسۇلتان نازاربايەۆ جاريا ەتكەن بەس الەۋمەتتىك باستامانى جۇزەگە اسىرۋ اياسىندا ازىرلەنگەن. مامىر ايىنىڭ سوڭىندا ۇلتتىق بانك بەكىتكەن باعدارلاما كەلەسى شارتتار ارقىلى يپوتەكالىق زايم بەرۋدى كوزدەيدى: سىياقى ستاۆكاسى - 7 پايىز، باستاپقى جارنا - 20 پايىز، زايم مەرزىمى - 25 جىلعا دەيىن.
