توكيوعا باراتىن سپورتشىلار 7 ايدا 15 رەتكە دەيىن دوپينگ-تەست تاپسىرعان
بۇل تۋرالى ۇلتتىق وليمپيادا كوميتەتىنىڭ باس حاتشىسى اندرەي كريۋكوۆ ايتتى.
«دوپينگ ماسەلەسى وتە وزەكتى. الەم بويىنشا بۇگىندە كەڭ اۋقىمدا كۇرەس ءجۇرىپ جاتىر. ءتىپتى پاندەميا كەزىندە دە سپورتشىلاردى تەستىلەۋ پروتسەسى توقتاعان جوق. ءبىزدىڭ ۇلتتىق دوپينگكە قارسى ورتالىعىمىزدىڭ ماماندارى دا، حالىقارالىق فەدەراتسيالاردىڭ دوپينگ وفيتسەرلەرى دە ارنايى شىعىپ، تەستىلەۋ وتكىزىپ وتىردى. ءبىز دە دوپينگكە ءتوزىم بولمايتىنىن مالىمدەپ ءجۇرمىز. دوپينگ تۋرالى جاڭا زاڭ دوپينگ رەجيمىن بۇزۋشىلاردى ەلەۋلى شارالارعا تاپ كەلتىرەدى. دوپينگپەن بايلانىستى كەز كەلگەن زاڭ بۇزۋ ارەكەتى قاتاڭ جازالاناتىنىن ايتۋ كەرەك»، - دەدى كوميتەتتىڭ باس حاتشىسى.
ونىڭ ايتۋىنشا، قازاقستاندىق سپورتشىلار جىل باسىنان بەرى حالىقارالىق دوپينگ-وفيتسەرلەردىڭ ءجىتى نازارىندا بولعان.
«اتلەتتەردىڭ ءارقايسىسىندا جەكە تەستىلەۋ جوسپارى بار. تەستىلەۋ اشىق بولۋى ءۇشىن، ءتۇرلى ايلا-شارعىلاردى بولدىرماۋ ءۇشىن تەكسەرۋدى ەكى ۇيىم عانا جاسايدى. ITA حالىقارالىق ۇيىمى مەن ءوزىمىزدىڭ ۇلتتىق دوپينگكە قارسى ورتالىق جۇرگىزەدى. حالىقارالىق ۇيىم جەتى ايدىڭ ىشىندە سپورتشىلاردى 10-12 رەتتەن تەكسەردى. ياعني، بۇل مىندەتتى پروتسەدۋرا. ودان جالتارۋعا بولمايدى. سپورتشىلار وزدەرىنىڭ ورنالاسقان جەرىن ايتىپ وتىرۋى كەرەك، تەستىلەۋ اياق استىنان، ەشبىر ەسكەرتۋسىز جۇرگىزىلەدى. سوندىقتان قانداي دا ءبىر ارەكەت جاساۋ قيىن. ءوزىمىزدىڭ دوپينگكە قارسى ورتالىقتىڭ ماماندارى ءار سپورتشىنى 2-4 رەتكە دەيىن تەستىلەۋدەن وتكىزدى. ءبىز ءوز تاراپىمىزدان بارلىق الدىن الۋ جانە باقىلاۋ شارالارىن اتقارىپ وتىرمىز»، - دەدى اندرەي كريۋكوۆ.
