پرەزيدەنت ورتالىق ازيا مەملەكەتتەرى باسشىلارىن قازاقستاندا وتەتىن 6-كونسۋلتاتيۆتىك كەزدەسۋگە شاقىردى

پرەزيدەنت قاسىم-جومارت توقايەۆ «ورتالىق ازيا» تۋريستىك برەندىن بىرگە ناسيحاتتاي وتىرىپ، ەلدەرىمىزدىڭ بىرەگەي تابيعاتىن جانە وزىنە ءتان باي مادەنيەتىن بۇكىل الەمگە تانىستىرۋعا كەرەمەت مۇمكىندىگىمىز بار ەكەنىن ايتتى، دەپ حابارلايدى قازاقپارات.

مەملەكەت باسشىسىنىڭ پايىمىنشا، اقپاراتتىق كەڭىستىكتەگى ىنتىماقتاستىقتى جانداندىرۋدىڭ پەرسپەكتيۆاسى زور.

«جوعارى ساپالى ورتاق مەدياجوبالاردى جۇزەگە اسىرۋ، سونىڭ ىشىندە جالپى وڭىرلىك تەلەارنا، جاڭالىقتار سايتىن قۇرۋ ىسىنە كىرىسۋدى ۇسىنامىن. بۇل مىندەتتەردىڭ ورىندالۋى ورتالىق ازيا ەلدەرىنىڭ سالالىق ۆەدومستۆولارى جانە اقپارات اگەنتتىكتەرى اراسىنداعى تۇراقتى ديالوگقا سەپتىگىن تيگىزەدى»، - دەدى ول.

پرەزيدەنتتىڭ ۇسىنىستارى مەملەكەتتەرىمىز اراسىنداعى قارىم-قاتىناستى جاڭا ساپالى دەڭگەيگە كوتەرۋ نيەتىنەن تۋىنداپ وتىر.

«قازاقستان وڭىردەگى ىنتىماقتاستىقتى ودان ءارى نىعايتۋعا مۇددەلى ەكەنىن تاعى دا اتاپ وتكىم كەلەدى. قۇرمەتتى ارىپتەستەر، سىزدەردى ورتالىق ازيا مەملەكەتتەرى باسشىلارىنىڭ قازاقستاندا وتەتىن 6-كونسۋلتاتيۆتىك كەزدەسۋىنە شاقىرامىن.

الداعى مىندەتتەردىڭ تابىستى جۇزەگە اسىرىلۋى دوستىقتى، تاتۋ كورشىلىك قارىم-قاتىناستى جانە ستراتەگيالىق سەرىكتەستىكتى ودان ءارى نىعايتۋعا مۇمكىندىك بەرەتىنىنە سەنىمدىمىن»، - دەدى سودان سوڭ مەملەكەت باسشىسى.